येँ महानगरपालिकापाखें रेडियो शिक्षा सुरु

येँ – येँ महानगरपालिकां रेडियो शिक्षा ज्याझ्वः सुरु याःगु दु । लकडाउनया ई ताःहाक जुयावनाच्वंगु इलय् वैकल्पिक माध्यमं ब्वंकेगु ताः तया महानगरपालिकां रेडियो शिक्षा ज्याझ्वः सुरु याःगु दु ।

महानगरपालिकां संचालन यानाच्वंगु मेट्रो एफएम ९४.६ मेगाहर्ज मार्फत थनिंनिसें आधारभूत निसें १० तगिं तकया रेडियो शिक्षा सुरु याःगु खः । बुधवाः सुथय् येँ महानगरपालिकाया मेयर विद्यासुन्दर शाक्यं उगु शिक्षा ज्याझ्वःया उलेज्या यानादीगु खः ।

उलेज्या यानादिसें मयेर शाक्यं छेँय् च्वनाच्वंपिं मस्तय्त वैकल्पिक रुपं शिक्षा बीगु उद्देश्यं महानगरपालिकां रेडियो शिक्षा ज्याझ्वः सुरु यानागु धयादिल । वय्कलं धयादिल, ‘थुगु ज्याझ्वपाखें जीवनप्रति थप उत्साह ब्वलंकीगु व शैक्षिक गतिविधियात निरन्तरता बीत नं ग्वाहालि जुइ ।’

ज्याझ्वलय् महानगरया प्रवक्ता नापं वडा नम्बर १५या अध्यक्ष ईश्वरमान डंगोलं महामारीया कारणं फुक्कं क्षेत्रय् समस्या लाकूगु धयादिसें उकी मध्ये तःधंगु समस्या शिक्षा क्षेत्रय् लागुलिं उकीयात सहज यानायंकेगु धयादिल ।

अथेहे महानगरपालिका शिक्षा विभागया शाखा अधिकृत मोति प्रसाद भट्टराईं थनिनिसें सुरु जूगु रेडियो शिक्षा मार्फत महानगरपालिका दुनेया ९१गू सामुदायिक विद्यालय, ३गू विशेष विद्यालय व ६ सय ४३गू संस्थागत विद्यालयलय् ब्वनाच्वंपिं विद्यार्थीत प्रत्याक्ष/अप्रत्यक्ष रुपं लाभान्वित जुइगु धयादिल ।

रेडियो शिक्षा ज्याझ्वः विद्यालयया शिक्षक–शिक्षिकातय्सं संचालन याइसा रेडियोकर्मीतय्सं सहजीकरणया ज्या याइ । न्हिन्हि न्ह्याइगु ज्याझ्वः मध्ये १ निसें ६ तगिंतकया संयोजन यायेगु जिम्मा सरस्वती निकेतन माविया प्रधानाध्यापक रविना महर्जनयात व ७ निसें १० तगिंया संयोजनया जिम्मा विश्व निकेतन माविया प्रधानाध्यापक हेरम्बराज कँडेलयात बिउगु दु ।