कट्टेलं नेकपा’ यंकल धाःसा छु जुइ ?

येँ (नेपालभाषा टाइम्स) – नेपाल कम्युनिष्ट पार्टीया नांयात कयाः सर्वोच्च अदालतय् दर्ता जुयाच्वंगु मुद्दाय् यदि ऋषि कट्टेल त्यात धाःसा ओली व नेपाल-दाहालं दावी यानाच्वंगु पार्टीया अवस्था छु जुइ ? ‘नेपाल कम्युनिष्ट पार्टी (नेकपा)’ धइगु नां थःपिसं हे न्हापा हे दर्ता याना तयागु जूगुलिं थ्व नां मेपिंसं छ्यले दइ मखु धकाः निर्वाचन आयोगयात विपक्षी दयेकुसें ऋषिराम कट्टेलं वंगु २०७५ मंसिरय् सर्वोच्च अदालतय् रिट तयातःगु खः । म्हिगः उकिया पेशी तयातःगु खःसां वहस धाःसा मजुल । नेकपा दुने विवाद ब्वलनेवं म्हिगः उगु मुद्दा पेशीया धलखय् लाःगु खः ।

आकाझाकां निदँ लिपा प्राथमिकताय् लाःगु उगु मुद्दाय् कट्टेलया पक्षय् अदालतं फैसला यात धाःसा सत्तारुढ नेकपाया नां छु जुइ धइगु न्ह्यसः ब्वलंगु दु। सत्तारुढ नेकपा दुने विवाद ब्वलनेवं अदालतं थुगु मुद्दायात न्ह्यःने न्ह्याकेगु संकेत बिउगु खँ सीदुगु दु । निर्वाचन आयोगं नेकपा (एमाले) व नेकपा (माओवादी केन्द्र) एकीकरण जुयाः बने दूगु दलयात २०७५ जेठ २३ गते ‘नेपाल कम्युनिष्ट पार्टी (नेकपा)’ नामं मान्यता बिउगु खः ।

निर्वाचन आयोगया छम्ह पदाधिकारीया कथं यदि सर्वोच्च अदालतं अज्याःगु निर्णय बिल धाःसा कट्टेलयात उगु नां बीत आयोग बाध्य जुइ । अदालतया निर्णय थःपिंसं पालना यायेमाः धासें वय्कलं अज्याःगु निर्णय पालना यायेगु थःपिनिगु दायित्व जूगु खँ नं कनादिल ।

साविकया नेकपायात उगु नां मवनेवं पार्टीया चुनावी चिंया बारे गज्याःगु निर्णय जुइ धइगु मेगु न्ह्यसः नं ब्वलनाच्वंगु दु । निर्वाचन आयोगया पदाधिकारीया कथं पार्टी केन्द्रीय कमिटीइ सुयागु बहुमत दइ वयात हे सुद्र्यः चिं बीगु जुइ । अल्पमतय् लाःगु पार्टीं न्हूगु चिं ल्ययेमाली । निगू पार्टीया रुपय् कुचा दःगु पार्टीया मू विवाद नं पार्टीया चुनावी चिंयात कयाः अप्वः जुइफइगु खँ धाःगु दु ।