एमसीसी व चुनावं गठबन्धनय् वःगु समस्या

सत्तारुढ गठबन्धन मूल रुपं प्रमुख प्रतिपक्ष दल एमाले विरुद्धया गठबन्धन खः । नेपाली कांग्रेस, नेपाल कम्युनिष्ट पार्टी (माओवादी केन्द्र), नेपाल कम्युनिष्ट पार्टी (एकीकृत समाजवादी), जनता समाजवादी पार्टी व राष्ट्रिय जनमोर्चा दुथ्याःगु गठबन्धनपाखें आःया अवस्थाय् संघीय सरकारया नेतृत्व यानाच्वंगु दु । एमालेया अध्यक्ष केपी शर्मा ओलीया कार्यशैलीया विरोधय् गठन जूगु गठबन्धन खः थ्व ।

प्रतिनिधिसभा निक्वः निक्वः तक विघटन याःगुया विरुद्ध दयेकूगु गठबन्धन नापं ओलीप्रतिया असन्तुष्ट पक्षधरतय्गु थ्व गठबन्धन याःगु खः । थुगु गठबन्धनपाखें थ्यंमथ्यं खुलाया दुने एमालेया नेतृत्वय् दुगु प्रदेश सरकारतय्त क्वःथलाः गठबन्धनया ल्हातय् लाकेत सफल जूगु दु । अथे हे राष्ट्रिय सभाया निर्वाचनय् छगू बाहेक फुक्क सिटय् गठबन्धन पक्षयात हे त्याकेत ताःलाःगु दु । थुगु ल्याखं स्वल धाःसा गठबन्धनं केन्द्रीय सरकार, प्रदेश सरकार अले राष्ट्रिय सभाया निर्वाचनय् एमालेयात बांमलाक बुकूगु खनेदु । एमाले विरुद्धया मोर्चाबन्दीं सफलता चूलाकूगु खनेदु ।

लिपांगु इलय् वयाः अमेरिकी परियोजना एमसीसी व स्थानीय तहया चुनावयात कयाः धाःसा गठबन्धन अलमलय् लाःगु दु । गठबन्धनया नेतृत्व यानाच्वंगु दल नेपाली कांग्रेस एमसीसी पास यायेगु पक्ष दुसा उगु हे गठबन्धनय् दुथ्याःगु माओवादी केन्द्र, एकीकृत समाजवादी व राष्ट्रिय जनमोर्चा स्पष्ट रुपं हे एमसीसीया विरोधय् दु । एमसीसीया सवालय् ब्यागलं ब्यागलं मत न्हापांनिसें दुगु जूसां थुगु गठबन्धनय् समस्या तच्वः मयायेगु कथं एमसीसी बारे कार्यदल दयेकाः अध्ययन नं याःगु खः । अथे खःसां लिपांगु इलय् वयाः धाःसा एमसीसी सत्तारुढ गठबन्धनया निंतिं तःधंगु हाथ्या जुयाबिउगु दु ।

गठबन्धनया नेतृत्व यानाच्वंगु दल कांग्रेस एमसीसीया पक्षय् दुसा गठबन्धत इतर जुयाच्वंगु प्रमुख प्रतिपक्ष दल एमाले नं एमसीसीया पक्षय् दु । थुगु ल्याखं स्वल धाःसा एमसीसी पास यायेगु खःसा कांग्रेसं प्रमुख प्रतिपक्षया साथ कायेमालीगु अवस्था दु । थ्व हे मौकायात ध्यानतय् तयाः एमाले अध्यक्ष केपी शर्मा ओलीं गठबन्धन त्वाःथल धाःसा कांग्रेसयात हे समर्थन यायेगु धकाः प्रस्ताव तयाच्वंगु चर्चा जुयाच्वंगु दु । थुगु ल्याखं स्वल धाःसा सत्तारुढ गठबन्धन आः छगू कथं छ्वासुसे च्वना वनाच्वंगु हे खनेदु ।

स्थानीय तहया चुनावया सवालय् नं एमाले व कांग्रेस याकः याकः चुनावय् ल्वायेगु पक्षय् दु । थ्व निगू दलं थःथःपिं न्हापांगु दल जुइ धकाः दावी याना वयाच्वंगु दु । उकिं गुलि फु उलि याकनं चुनाव यायेगु पक्षय् थ्व निगू दल दु । गठबन्धनय् दुगु दल मध्ये माओवादी केन्द्र, एकीकृत समाजवादी, राष्ट्रिय जनमोर्चानिसें जनता समाजवादी पार्टी धाःसा फयांफत्तले मोर्चाबन्दी जुयाः चुनाव ल्वायेगु लिसें जिउसा स्थानीय चुनाव छुं ई जूसां लिछ्यायेगु पक्षय् दु । उकिं स्थानीय चुनावया सवालय् नं गठबन्धन दुने छगू मत जुयाच्वंगु मदु । कांग्रेसया मत छगू जुयाच्वंगु दुसा मेमेपिनिगु मत मेकथं जुयाच्वंगु दु । अय्नं दथुइया लँपु नालाः ऐन व संविधान बाझे जूगु अवस्था दुगुलिं ऐन संशोधन याना वनेगु कथंया नीति ज्वंगु दु सत्तारुढ गठबन्धनं । गठबन्धनया समस्या ज्यंकेगु थ्व छगू कथंया तत्कालिन लँपु जक खः ।

सत्तारुढ गठबन्धनया दाउ
थ्व इलय् एमसीसीनिसें स्थानीय तहया चुनावया सवाल गुगुु कथं न्ह्यःने वयाच्वन थुकियात संसदय् यंकेफत धाःसा अबरुद्ध जुयाच्वंगु संसद नं चालीगु अले सरकारयात नं अःपुइगु गठबन्धनं तायेकूगु दु । खुला न्ह्यवंनिसें एमालें संसद अबरुद्ध याना वयाच्वंगु अवस्थाय् स्थानीय तहया चुनावया नितिं ऐन संशोधनया प्रस्ताव यंकेगु अले एमसीसीयात नं टेबुल यायेगु प्रस्ताव हयेगु खँ दु । थुकियात एमालें बेवास्ता याना संसद अवरुद्ध हे यानाच्वन धाःसा थ्व फुक्क कारण एमाले खः धकाः छगू कथं गं घाकेगु योजना गठबन्धनया दु ।

छखे चुनाव धकाः नं हालेगु मेखे चुनावया नितिं माःगु ऐन तकं पारित याकेमबिइम्ह एमाले हे खः धकाः क्यनेगु नापं जनतायाथाय् वनेगु योजना सत्तारुढ गठबन्धनं दयेकूगु दु । उकिं थ्व इलय् एमाले विरुद्धया मोर्चाबन्दीया रुपय् गुलि फु उलि वनेगु कथंया दाउ सत्तारुढ गठबन्धनं ज्वनाच्वंगु दु । आः संसद चालीगु अवस्थाय् एमालेया भूमिका छु जुइ ? एमालें छु याइ ? उकिया हे आधारय् थःपिं न्ह्याःवनेगु योजना सत्तारुढ गठबन्धनं दयेकूगु खनेदु ।
एमालेया दाउ
प्रमुख प्रतिपक्ष दल एमाले धाःसा न्ह्याथे यानाः जूसां सत्तारुढ गठबन्धनयात तछ्यायेगु योजनाय् दु । थौंकन्हय् अप्वः याना स्थानीय तह थःपिनिगु हे नेतृत्वय् दुगुलिं आःया अवस्थाय् चुनाव यात धाःसा चुनाव त्याकेत अःपुइगु एमालेया विश्लेषण दु । अले स्थानीय तहया चुनाव जुल धाःसा आःया सत्तारुढ गठबन्धन तज्याइगु अवस्था वइ धयागु नं एमालेया बुझाई दु ।

स्थानीय तहलय् गठबन्धन कथं मंकाः उम्मेदवार बिइ फइमखुगु जुयाः हे एमाले गुलि फु उलि याकनं स्थानीय तहया चुनाव यायेमाः धयागु पक्षय् वनाच्वंगु दु । अथे हे आःया प्रतिनिधिसभा ज्याख्यलय् मवये धुंकल धकाः हे थःपिंसं निक्वः तक विघटन यानागुयात पाय्छि जुल धकाः पुष्टि यायेगु नितिं जूसां संसदयात अबरुद्ध याना हे च्वनेमाःगु बाध्यकारी अवस्था एमालेया दु । संसद् संचालन जुल धाःसा थःपिंसं यानागु ज्या गलत जुल धकाः सन्देश वनीगु अवस्था जुयाः संसदयात न्ह्या हे मन्ह्याकूसे स्थानीय चुनाव, प्रदेश चुनाव व संघया चुनाव यायेफत धाःसा नैतिक रुपं थःपिं विजय जुइगु अले जनतायात थुइकेत अःपुइगु तायेका एमालें पालितःलंंनिसें बल यानाः संसद अबरुद्ध याना वयाच्वंगु दु ।

थुकिया निंतिं मालधाःसा कांग्रेस याकःचित सरकार संचालन याकेगु निंतिं बिना सर्त समर्थन यायेगु योजना एमालेया खनेदु । थुकिया अर्थ आःया अवस्थाय् एमालें मूल रुपं कांग्रेसयात स्वीकार याना वनेगु तर माओवादी केन्द्र व एकिकृत समाजवादी पार्टीयात अस्वीकार यायेगु खः ।

थुगु कथं कांग्रेस, माओवादी केन्द्र, नेकपा एस, जसपा व राजमोया सत्तारुढ गठबन्धन व प्रमुख प्रतिपक्ष एमालेया दाउ स्वयेबलय् आः नेपाःया राजनीति गुखेपाखे न्ह्याः वनी धयागु खँ अझ नं अन्यौल हे अवस्थाय् दु । प्रतिनिधिसभाया बैठक गुकथं जुइ ? अले सत्तारुढ गठबन्धनया योजना गुकथं वइ ? उगु इलय् प्रमुख प्रतिपक्षया भूमिका छु जुइ ? धयागु खनेदुगु अवस्थाय् जक नेपाःया राजनीति थुखेपाखे वनी धकाः धायेफइ । तर थुपिं फुक्कं न्ह्यसःया लिसः मदुगुलिं राजनीति नं गुखेपाखे न्ह्याःवनी धायेफुगु अवस्थाय् मदुनि ।

न्ह्यागु हे जूसां आखिर सत्तारुढ गठबन्धयात एमसीसीया मुद्दा नापं स्थानीय तहया चुनावया सवाल समस्याया रुपय् वःगु हे खः । थुगु निगू समस्यायात गुगु कथं समाधान यायेफइ धयागु आःतक नं स्पष्ट जूगु मदुनि । सत्तारुढ गठबन्धनय् दुने एक मत जुइफुगु अवस्था मदुनि । थुगु निगू मुद्दाय् सत्तारुढ गठबन्धन छगू हे मत जुयाः वनेफत धाःसा जक गठबन्धनयात अझ ताःहाकः यंकेफइ मखुसा गठवन्धन गुगु नं इलय् त्वाःदलेफु । अज्याःगु अवस्थाय् न्हूगु हे कथंया गठबन्धन जुइफुगु अवस्था नं दु । माओवादी केन्द्र, नेकपा एस व जसपाया न्हूगु मोर्चा निर्माण जुयावनीगु नं उलि हे सम्भावना दु ।

सम्बन्धित बुखँ

LEAVE YOUR COMMENTS