ऋषि कट्टेलयात ‘नेकपां’ पितिन

येँ -एकीकरण जुइधुंकूगु एमाले व माओवादीयात हानं टुक्रा यानाः निगू हे पार्टी दयेकेगु ज्याय् मू भूमिका दुम्ह नेकपाया अध्यक्ष ऋषि कट्टेलयात थःगु हे पार्टीं पितिना हःगु दु ।

वय्कलं पार्टी हित विपरित ज्याखँ याःगु द्वपं बिसें वय्कःयात पार्टीया साधारण सदस्यता तकं मदइ कथं पितिना हःगु खः। पार्टीया प्रवक्ता लोकनारायण सुवेदीं पित बिउगु वक्तव्यय् धयातःकथं कट्टेलयात केन्द्रीय सदस्यया बहुमतं निर्णय यासें निष्काशन याःगु खः ।

कट्टेलं धाःसा थःगु पार्टीया ‘नेकपा’ धइगु नां कब्जा यायेगु लागिं सत्ता गठबन्धनय् दुथ्याःगु दलतय्सं थःत निष्काशन याकूगु धकाः द्वपं बियादीगु दु । वय्कलं पार्टीया नां मकाःसां नेकपा (एस) व नेकपा माओवादीया नेतातय्सं पार्टी दुने हस्तक्षेप यानाः थ्व ज्या याकूगु खः धयादीगु दु ।

लुमंकेबहः जू, ऋषि कट्टेलं ‘नेकपा’ धइगु थःगु पार्टीया नां जूगु कारणं एमाले व माओवादी एकीकरण जूगु पार्टीया नां ‘नेकपा’ तये दइ मखु धकाः सर्वोच्चय् दायर याःगु रिटया कारणं हे एमाले व माओवादी पूर्व अवस्थाय् लिहां वंगु खः।