ने. सं. ११४४ कौलाथ्व षष्ठी -

वालुवाटारय् हे तामझामया विरोध

सामान्य ज्यायात असामान्य ढंगं प्रचार याःगु द्वपं

येँ – सामाजिक सुरक्षा कोष घोषणा जूगु न्हि कुन्हु म्हिगः सरकारं क्यंगु तामझामपूर्ण ज्याखँयात स्वयम् सत्तारुढ पार्टी दुने हे असन्तुष्टि प्वंका हःगु दु । खास यानाः म्हिगः पिहां वःगु फुक्क हे राष्ट्रिय न्हिपती निगू निगू पेज ‘ज्याकेट विज्ञापन’ प्रकाशन यानाः ब्वःगु तामझामं वालुवाटर दुने हे असन्तुष्टि ब्वलंगु खँ सूत्रं धाःगु दु ।

सामाजिक सुरक्षा कोषया घोषणा उकथं तामझाम यायेमाःगु ज्या मखुगु खँ विज्ञतय्सं धाःगु दु । थ्व सुरक्षा कोषया घोषणा सरकारं थथे तामझामपूर्वक याःसां थ्व कोष सम्बन्धी ज्याखँ याइगु ज्याकू धाःसा बबरमहलस्थित जिल्ला समन्वय समितिया कार्यालय भवन दुने हे भचा तकूगु छकू क्वथा कयाः सञ्चालन जुयाच्वंगु दु ।

थुकिया प्रचार यायेगु लागिं म्हिगः सरकारं राजधानीं पिहां वइगु फुक्क हे राष्ट्रिय न्हिपती प्रकाशन याःगु विज्ञापनया दां जक करिब निगू करोड तुइगु अनुमान याःगु दु । थ्व विज्ञापन सरकार थम्हं हे खर्च मयासे थीथी व्यावसायिक संस्थातय्त खर्च याकेगु ल्याखं प्रकाशन याके बिउगु खः ।

अथे ध्यबा खर्च याःगु निकाय मध्ये छगू एनसेन नं लाःगु दु । लुमंकेबहः जू, नेपाः सरकारयात पुले माःगु लाभकर मपूगु खँयात कयाः अर्थ मन्त्रालय व एनसेल दथुइ तःधंगु विवाद जुयाच्वंगु दु । व्यापारिक संस्थातय्सं सरकारी विज्ञापनया प्रायोजन याःगुलिं उमिसं कन्हय् उकिया लबः उठे याये फइगु खँ सूत्रं धाःगु दु ।

टिकापुर हत्या काण्डय् जेलय् लानाच्वंपिं लक्ष्मण थारु व चुन्नीलाल चौधरीं पहिचानया आन्दोलन अझ च्वन्ह्याका यंकेमाःगु खँ धाःगु दु । नेपाः पार्टीया अध्यक्ष विजय सैंजु लिसे कारागारय् नापलायेगु झ्वलय् वय्कःपिंसं उगु खँ धाःगु खः ।

फुक्क पत्रिकाय् ज्याकेट विज्ञापन व सतक सतकय् पोष्टर तिकाः तामझाम याःगुलिं थ्व गलत ज्या जुल धकाः वालुवाटारलिसे सतीपिं नेता व कार्यकर्तातय्सं हे धयाहःगुलिं थ्व ज्या विवादय् लाःगु खँ सूत्रं धाःगु दु ।

एमाले सांसद बिन्दा पाण्डें सरकारं हःगु थ्व सामाजिक सुरक्षा कोषं घरेलु ज्यामितय्त छुटे याःगुलिं थ्व ज्या पूर्ण मजू धकाः आलोचना यानादीगु दु । प्रम ओलीं धाःसा म्हिगः थुकियात कयाः जूगु उलेज्या समारोहय् सरकार मखं धयाच्वंपिंत सरकार क्यनेगु लागिं हे थथे तामझाम यानागु खः धकाः कनादीगु दु ।