येँ महानगरपालिका मेयरय् बालेन शाह, उपमेयरय् सुनिता डंगोल त्याःगु घोषणा
येँ (नेपालभाषा टाइम्स)- येँ महानगरपालिकाया मेयरय् स्वतन्त्र उम्मेदवार बालेन्द्र साह (बालेन) त्याःगु दु । अथेहे उपमेयरय् नेकपा एमालेया उम्मेदवार सुनिता डंगोल त्याःगु दु । बालेन साह ६१ हजार ७६७ मत हयाः येँ महानगरपालिकाया मेयर जूगु खः । वय्कःया निकटम प्रतिद्वन्दी नेपाली कांग्रेसया उम्मेदवार सिर्जना सिंह ३८ हजार ३४१ मत हःगु खःसा नेकपा एमालेया उम्मेदवार केशव स्थापितं ३८ हजार ११७ मत हःगु खः । अथेहे स्वतन्त्र उम्मेदवार सुमन साय्मियात १३७७० मत वःगु दु ।
अथेहे उपमेयरय् ६८ हजार ६१२ मत हयाः डंगोल विजयी जूगु खः । डंगोल थुगुसीया स्थानीय चुनावय् देय्न्यंकंया हे दकलय् अप्वः मत हःम्ह खः । वय्कःया निकटम प्रतिद्वन्द्वी सत्ता गठबन्धनया रामेश्वर श्रेष्ठं २३ हजार ८०६ मत हःगु खः । स्वतन्त्र उम्मेदवार विद्या श्रेष्ठ १३६९५ मत काःगु दु ।
थौं सनिलय् वडा नं. १४ या अन्तिम बाकस चायेकाः गणना शुरु याःगु खःसा उकिया मत ल्याः खाये क्वचायेवं मतगणना नं क्वचाःगु खः । १४ वडाय् नेपाली कांग्रेसया सुमन श्रेष्ठ वडा अध्यक्षय् त्याःगु खः ।
मतगणना क्वचायेवं निर्वाचन आयोगं बहनी हे येँ महानगरपालिकाया मेयरय् बालेन शाह व उपमेयरय् सुनिता डंगोल त्याःगु घोषणा याःगु खः । आयोगं कन्हय् औपचारिक रुपं मेयर व उपमेयरयात निर्वाचित जूगु प्रमाणपत्र लःल्हायेगु खँ धाःगु दु ।
थुगु चुनावय् येँ मनपाया ३२ गू वडा मध्ये नेपाली कांग्रेस १९ गू वडाय्, नेकपा एमालेया १२ गू वडाय् व नेकपा एकीकृत समाजवादी छगू वडाय् वडाध्यक्षय् त्याःगु दु । नेपाली कांग्रेस ६, ७, ८, ९, १०, ११, १२, १४, १६, १७, १९, २०, २४, २५, २६, २७, २८, २९ व ३०य्, नेकपा एमाले १, २, ३, ४, ५, १३, १८, २१, २२, २३, ३१ व ३२ वडाय् त्याःगु खःसा १५ वडाय् नेकपा समाजवादीया ईश्वरमान डंगोल त्याःगु खः ।
येँ मनपाया बोर्डय् आः नेपाली कांग्रेसया बहुमत दइगु जूगु दुसा न्हापा बहुमत दुगु एमाले आः अल्पमतय् लाःगु दु । मेखे मेयर धाःसा स्वतन्त्र जूगु कारणं आः येँ मनपा दुने स्वंगू शक्तिया संघर्ष जुइ फइगु अनुमान याना हःगु दु ।
LEAVE YOUR COMMENTS