नारायणघाट–मुग्लिन सतक आयोजना हाकनं म्याद थपया माग

येँ – नारायणघाट–मुग्लिन सतक आयोजनाया म्याद हाकनं थप यायेत माग याःगु दु । सतक आयोजना निर्माण कम्पनीतय्सं प्यक्वःखुसी म्याद थप जूसां आयोजनाया ज्या क्वचायेके मफयेवं हाकनं म्याद थपया निंतिं माग याःगु खः । आयोजनाया प्यक्वःखुसी थप जूगु म्यादमध्ये न्हापांगु खण्डया म्याद सिधये धुंकूगु दुसा निगूगु व स्वंगूगु खण्डया म्याद नं बाःछि जक ई ल्यं दनि ।

न्हापांगु खण्डया म्याद वंगु मई १८, २०१८ य् सिधःगु खःसा निगूगु व स्वंगूगु खण्डया म्याद थनिं बाःछि जक ल्यं दनि । निगूगु व स्वंगूगु खण्डया म्याद छसिकथं मई २० व ३० तारिखतकया निंतिं खः । न्हापांगु खण्डय् ४०० मिटर व स्वंगूगु खण्डया सतक १,८०० मिटर कालोपत्रे याये ल्यं दनिसा निगूगु खण्डया सतकया कालोपत्र यायेगु ज्या धाःसा क्वचाये धुंकूगु दु ।

आयोजनाया परामर्शदाता कम्पनीया आवासीय इन्जिनियर पुष्कर रेग्मीयाकथं आतकया दुने उगु सतकखण्डया ८६.३८ प्रतिशत ज्या क्वचाये धुंकूगु दु । वय्कलं बियादीगु जानकारीकथं न्हापांगु खण्डया तसकय् ८३.३, निगूगु खण्डया सतकय् ९५.७३ व स्वंगूगु खण्डया सतकय् ८०.१३ प्रतिशत ज्या सिधये धुंकूगु दु ।

न्हापांगु व निक्वःखुसी थप जूगु इलय् वा वयाः ज्या यायेत मछिंगु नापं सतक जामया कारणं ज्या याये मखंगु, उकिसनं न्हापा माग याःकथंया ई थप मयाःगुलिं मिति थप यायेमाःगु आयोजनां धाःगु दु ।