ने. सं. ११४४ कौलाथ्व पारू - नःलास्वनेगु

राष्ट्रपतिपाखें मरु सतः लोकार्पण

येँ – ताःईया अन्यौल व विवाद लिपा म्हिगः अन्ततः मरु सतःया लोकार्पण (उलेज्या) जूगु दु । राष्ट्रपति विद्यादेवी भण्डारीं म्हिगः मरु सतःया मू लुखाय् तयातःगु सिजःपौ उलेज्या यासें थुकिया लोकर्पण यानादीगु खः । लोकार्पणया लागिं काष्ठमण्डप पुनर्निर्माण समितिया नायः राजेश शाक्यं येँ मनपाया मेयर विद्यासुन्दर शाक्ययात मरु सतःया ताःचा लःल्हानादीगु खःसा मेयर शाक्यं उगु ताःचा राष्ट्रपतियात लःल्हासें सांकेतिक रुपं सकस्यां लागिं लुखा चाःगु घोषणा यानादीगु खः । वयां लिपा राष्ट्रपति भण्डारीं उगु माःताःचा मेयर शाक्ययात लःल्हाना थकूगु खः ।

ज्याझ्वःयात सम्बोधन यासें राष्ट्रपति भण्डारीं मरु सतः धस्वाःगु धइगु सम्पूर्ण राष्ट्रया लागिं हे लसताया खँ खः धयादिल । थःगु स्रोत, साधन व सीप छ्यलाः मरु सतः दयेकूगु कारणं झीगु सम्पदा निर्माण व पुनर्निर्माण यायेत झी थः हे सक्षम खः धइगु खँ प्रमाणित जूगु खँ नं राष्ट्रपति भण्डारीं कनादिल ।

येँ महानगरपालिकाया मेयर विद्या सुन्दर शाक्यं नेपाःया सम्पदा निर्माण यायेगु लागिं सुं विदेशीयाके ध्यबा काये माःगु आवश्यकता मदु धासें सम्पदा निर्माण यायेगु क्षमता व दक्षता झीके अझ नं दनि धइगु खँ मरु सतःया पुनर्निर्माण पुष्टि जूगु दावी यानादिल । मरु सतःया मूर्ति बारे अदालतलिसे महानगरपालिकाया छुं विवाद मदुगु व अदालतं छु निर्णय यात वहे स्वीकार याये धायेधुंकूगुलिं उकी कचमच पिकया च्वनेमाःगु आवश्यकता मदुगु खँ नं वय्कलं कुलादिल ।

काष्ठमण्डप पुनर्निर्माण समितिया नायः सांसद राजेश शाक्यं लसकुस न्वचु बिसें येँ मनपां सम्पूर्ण आर्थिक भार काःगु व यक्व व्यक्ति एवं निकायया ग्वाहालि दयाः मरु सतः दयेकेत ताःलाःगु खः धयादिल ।

पुरातत्व विभागया महानिर्देशक दामोदर गौतमं मरु सतः विश्व सम्पदाय् लाःगु ‘क’ वर्गया सम्पदा खः धासें थ्व सतः सन् ६३५ निसें ६७० तकया दुने निर्माण जूगु प्रमाण लुया वःगु खँ कनादिल । पुनर्निर्माण समितिया दुजः अरुणा नकर्मीं मरु सतः स्रोत, साधन व सीपया ल्याखं नं पूर्ण रुपं नेपाली सम्पदा खः धयादिल । प्रा.डा. प्रेमनाथ मास्कें नब्बे सालया भुखाचय् मदुंगु मरु सतः ०७२ सालया भुखाचय् दुंगुया कारण थुकिया मर्मत सम्भार मजूगु कारणं हे खः धासें आः थुकी नं ध्यान बीमाः धयादिल ।
ज्याझ्वलय् मरु सतः पुनर्निर्माणय् ग्वाहालि याःपिं थीथी व्यक्तियात हनापौ नं देछायेगु ज्या जूगु खः ।

लोकार्पण याके मबीगु कुतः विफल
मरु सतः दुने च्वंपिं गोरखनाथ व प्यम्ह गणेद्यःया मूर्ति न्हूगु तःगु विरुद्ध सर्वोच्च अदालतय् मुद्दा लानाच्वंगु धासें छपुचः मनूतय्सं लोकार्पण हे याके मबीकेगु कुतः याःगु खः । उकिया लागिं राष्ट्रपतियात समेत पौ च्वयाः ज्याझ्वलय् मवनेत इनाप याःगु खः । लोकार्पण ज्याझ्वः स्थगित या धकाः २० वडा ज्याकूपाखें पुनर्निर्माण समितियात पौ नं छ्वया हःगु खः । मूर्तिबारे मुद्दा दयेक दयेकं लोकार्पण यात धासें उपमेयर हरिप्रभा खड्गी लगायत कांग्रेसया वडा अध्यक्षतय्सं तकं म्हिगःया ज्याझ्वः बहिष्कार याःगु खः । तर लोकार्पण विफल यायेत स्वःगु खःसां ज्याझ्वः यायेत धाःसा ग्वसाः खलः ताःलाःगु खः ।