भगवान बुद्धया पाजुपिनि नगरय् उत्खनन्

येँ (नेपालभाषा टाइम्स)- भगवान बुद्धया पाजुपिनि नगर धकाः नांजाःगु रामग्रामय् पुरातात्विक उत्खनन् ज्या शुरु याःगु दु । ऐतिहासिक तथा पुरातात्विक स्थल कथं नांजाःगु पश्चिम नवलपरासी लागाय् लाःगु रामग्राम–१८ स्थित पण्डितपुरय् थ्व उत्खनन् ज्या याःगु खः । पुरातत्व विभागं थ्व उत्खनन् सुरु याःगु खः । थ्व स्वयां न्ह्यः भू–भौतिक सर्वेक्षण (जिओफिजिक्स सर्वे) जूबलय् अन बुद्धकालीन प्राचीन सहरया संरचना लुया वःगु खःसा आःया उत्खनन नं अन हे याःगु खः ।

पुरातत्व विभागं धाःकथं थ्व उत्खनन स्ववाः तक न्ह्याइ । स्वयाःया दुने गुलि ज्वलं लुया वल उकिया लिधंसाय् हानं विश्लेषण याइगु खँ
धाःगु दु ।

थन लुयावःगु पुरातात्विक ज्वलंया वैज्ञानिक परीक्षण जूबलय् अन खुगूगु शताब्दीया संरचनात लुया वःगु कारणं आः विस्तृत रूपं उत्खनन सुरु याःगु खः । थुकिया लागिं आवश्यक बजेट संघ, प्रदेश र स्थानीय सरकारं नं विनियोजन याःगु खँ रामग्रामया नगर प्रमुख धनपत यादवं कनादिल । पण्डितपुरं दक्षिण पश्चिम क्षेत्रय् याःगु भू–भौतिक सर्वेक्षणया झ्वलय् अन बँया क्वय् गोलाकार बांलूगु संरचना लुया वःगु खःसा वहे क्षेत्रय् उत्खनन सुरु याःगु खँ पुरातत्व विभागया वरिष्ठ पुरातत्व अधिकृत भास्कर ज्ञवालीं कनादिल ।

पण्डितपुरयात कोलीय गणराज्यया राजधानी लिसें बुद्धया पाजु खलः धकाः दावी याना वयाच्वंगु दु । वि.सं. २०६८ निसें २०७२ तक पुरातत्व विभागं परम्परागत प्रविधिया ग्वाहालिं उत्खननया झ्वलय् च्यागूगु शताब्दीया थलबल, तुं व अप्पा लुया वःगु खः ।