येँ देय्या सभ्यता व संस्कृतियात अन्तर्राष्ट्रिस्तरय् न्यंकेत पहल शुरु
येँ – येँ देय्या पुलांगु सभ्यता व संस्कृतियात अन्तर्राष्ट्रिय जगतय् न्यंकेया निंतिं कुतः न्ह्याकीगु जूगु दु । विश्व सम्पदा उत्सव मूल समारोह समितिया ग्वसालय् उकथंया ज्या न्ह्याकूगु खः ।येँ देय्या पुलांगु सभ्यता व संस्कृतियात अन्तर्राष्ट्रिय जगतय् न्यंकेगु ल्याखं सुझाव नं संकलन यायेगु ज्या न्ह्याकेधुंकूगु दु ।येँ देय्या प्राचीन सभ्यता, संस्कृति नापं जनजीवनयात अन्तर्राष्ट्रिय जगतय् प्रचार प्रसार व प्रवद्र्धन यायेगु ल्याखं थनया निर्वाचित जनप्रतिनिधितय्सं स्वयम्भू, हनुमानध्वाखा व बसन्तपू लाय्कू लाषया अनुगमन यायेगु नापं स्थानीयवासीतय् सुझाव संकलन यायेगु ज्या न्ह्याकूगु खः । विश्व सम्पदाया धलखय् दुथ्यानाच्वंगु स्वयम्भू, बसन्तपू हनुमानध्वाखा लाय्कू लागाया प्राचीन सभ्यता व संचनायात जीवन्त तयेगु ल्याखं ‘सम्पदा मार्ग’या रुपय् संजाल दयेकाः उकथं सुुझाव कायेगु ज्या न्ह्याकूगु खः । सांस्कृतिक विविधतां जाःगु नेपाली समाजय् बिस्कं बिस्कंकथंया परम्परा व मान्यतायात संरक्षण यानाः संजालय् स्वाये फत धाःसा उकिं थुगु लागाय् पर्यटकतय्त आकर्षित याये फइगु सुझाव स्थानीयवासीतय्सं बिउगु दु ।
बसन्तपू लाय्कू लागानिसें स्वयम्भू तकया सम्पदा मार्गया अनुगमन यायेगु झ्वलय् उगु लागाय् लाःगु देगः, फल्चा, सतः, विहार, चैत्य लगायत धार्मिक, ऐतिहासिक, सांस्कृतिक व पुरातात्विक महत्वया सम्पदाया ऐतिहासिक पक्ष व विशेषतायात नं ध्यान बीमाःगु सुझाव स्थानीयवासीतय्सं बिउगु दु । थुपिं निगू सम्पदा क्षेत्रयात सम्पदा मार्ग संजालया रुपय् स्वायेगु निंतिं सक्रिय रुपं लगे जुयाच्वनादीम्ह सांसद जीवनराम श्रेष्ठं थुग लागाय् बौद्ध व हिन्दू धर्मावलम्बितय् आपालं सम्पदा, फल्चा, सतः, विहार, चैत्य लगायतया सम्पदात दुगुलिं दक्वंयात व्यवस्थित रुपं संरक्षण याये फत धाःसा येँ देय्या पुलांगु सभ्यतायात अन्तर्राष्ट्रिय जगतय् न्यंके फइगु विश्वास प्वंकादीगु दु ।
LEAVE YOUR COMMENTS