‘मांभाय् ल्हाये मसःम्ह आदिवासी जुइ मखु’

येँ- आदिवासी जनजाति पत्रकारतय्सं फये मालाच्वंगु समस्यात निराकरण यायेगु लागिं आः नेपाल पत्रकार महासंघं नं पहल याइगु जूगु दु । म्हिगः पत्रकार महासंघया ग्वसालय् जूगु ‘आदिवासी जनजाति पत्रकारया अवस्था व समावेशीकरण’ विषयक ज्याझ्वलय् न्ववासें पत्रकार महासंघया पदाधिकारीतय्सं थ्व बचं बियादीगु खः ।

ज्याझ्वलय् थःगु नुगःखँ तसें भाषा आयोगया प्रमुख आयुक्त डा. लवदेव अवस्थीं थौंकन्हय् अंग्रेजी भाषाया शिक्षणं नेपाःया भाषात जक मखु थनया मौलिक संस्कृतिइ तकं विकृतित दुत हःगु खँ कनादिल । लिसें वय्कलं थःगु मांभाय् मसःपिं मनूतय्त आदिवासी धाये फइ मखु धासें आदिवासी जुइगु खःसा थःगु मांभाय् नं अनिवार्य रुपं ल्हायेमाःगु जिकिर नं यानादिल ।

आदिवासी जनजाति आयोगया प्रमुख आयुक्त रामबहादुर थापा मगरं थीथी मांभासं पिहां वइगु पत्रपत्रिकायात प्रेस काउन्सिलपाखें विशेष व्यवस्था यानाः संरक्षण यायेमाःगु बिचाः तसें उकिया लागिं पत्रकार महासंघं पहल यायेमाःगु व माल धाःसा आयोगपाखें नं ग्वाहालि यायेगु बचं बियादिल ।

ग्वसाः खलः पत्रकार महासंघया नायः विपुल पोखरेलं ज्याझ्वलय् व्यक्त जूगु बिचाःयात थःपिंसं गम्भीर रुपं कासें फलोअप समेत यायेगु बचं बियादिल । अथे हे महासंघया सचिव नारायण किलम्बुं नं आदिवासी पत्रकारतय् समस्यायात कयाः अन पिहां वःगु खँयात लिपिवद्ध यानाः सम्बन्धित निकायय् वनाः धाः वनेगु खँ कनादिल ।

ज्याझ्वलय् न्ववासें आदिवासी जनजाति पत्रकार महासंघया न्वकु गजुरधन राईं नेपालय् ३७ प्रतिशत जनजाति दुसां पत्रकारिताय् धाःसा ६ प्रतिशत जक दुगु खँ कनादिल । अथे हे ज्याझ्वलय् नेवाः राष्ट्रिय पत्रकार दबूया सल्लाहकारपिं राजु शाक्य, सुरेश किरण, छ्यांज्ये सुनिल महर्जन लिसें तामाङ, थारू, राई, शेर्पा आदि भाय्या पत्रकार संघया पदाधिकारीतय्सं नं नुगःखँ प्वंकुसें थःपिंसं फये मालाच्वंगु समस्या बारे अवगत याकूगु खः ।