बिदा न्याकेत दयेकातःगु ज्याझ्वः रद्द यायेत विश्व स्वास्थ्य संगठनया इनाप

एजेन्सी÷ कोरोनाया ओमिक्रोन भेरियन्ट न्यना वनाच्वंगुलिं विश्व स्वास्थ्य संगठनं सर्वसाधारणयात जनस्वास्थ्य रक्षाया निंतिं क्रिसमसया इलय् बिदा न्याकेत दयेकातःगु ज्याझ्वः रद्द यायेत इनाप याःगु दु । विश्व स्वास्थ्य संगठनया प्रमुख डा. टेड्रोस एड्हानोम गेहबे्रयससं धाःगु दु ‘जीवन रद्द जुइगुसिबें छगू ज्याझ्वः रद्द यायेगु बांलाः’ । डा. टेड्रोसं ओमिक्रोन भेरियन्ट डेल्टासिबें तीव्र गतिं न्याना वनाच्वंगु खँ नं धाःगु दु । न्हूगु भेरियन्टयात पनेत फ्रान्स व जर्मनीइ कडा नियम हःगु दुसा यात्रा प्रतिबन्ध नं तयेधुंकूगु खँ डा. टेड्रोसं न्ह्यथंगु खः ।

अमेरिकया प्रमुख संक्रामक रोग विशेषज्ञ डा. एन्थोनी फाउचीं नं क्रिसमसया इलय् याइगु यात्राया झ्वलय् कोरोनाया खोप कायेधुंकूपिंत नं संक्रमण जुइफु धाःगु खः । ओमिक्रोन भेरियन्टयात पनेत अमेरिकाया सेन्टर फर डिजिज कन्ट्रोल एण्ड प्रिभेन्सन व अमेरिकाया विदेश मन्त्रालयं स्पेन, फिनल्याण्ड, लेबानानलिसें च्यागू देसय् यात्रा मयायेत अमेरिकाया सर्वसाधारणयात इनाप याःगु दु । अमेरिकाय् नं ओमिक्रोनया संक्रमण अप्वयाच्वंगु दु । अमेरिकाया ४८ गू राज्यय् ओमिक्रोन खनेदयेधुंकल ।

युरोपय् ओमिक्रोनया कारणं युरोपेली देय्तय्सं कोरोनाया थीथी नियम लागु याःगु दुसा प्रतिबन्धात्मक व्यवस्था नं लागु यानाच्वंगु दु । नेदरल्याण्ड्सय् आतकया हे कडा लकडाउनया घोषणा याये धुंकूगु दु । अथे हे लन्डनय् न्यु इएर इभय् जुइगु दक्व ज्याझ्वः रद्द याःगु दु । बेलायतय् कोरोनाया विरुद्ध न्हूगु नियम हयेत्यंगु दु । अमेरिकालिसें थीथी देसं थः नागरिकतय्त बुस्टर डोज कायेत नं इनाप यानाच्वंगु दु ।

थ्व हे झ्वलय् न्युजिल्याण्डं विदेशी नागरिकतय्गु निंतिं जनवरी १६ तारिखनिसें चायेकेत्यंगु अन्तर्राष्ट्रिय सीमाना फेब्रुअरीया अन्ततकया बन्द हे यायेगु निर्णय याःगु दु । मंगलवाः न्युजिल्याण्डया शिक्षा मन्त्री क्रिस हिपकिन्सं ओमिक्रोनया कारणं सिमाना चायेकेगु निर्णय लित छ्वयेमाःगु धाःगु खः । न्यूजिल्याण्डय् कोरोनाया नियम छ्वासुका यंकाच्वंगु दु ।

सम्बन्धित बुखँ

LEAVE YOUR COMMENTS