लायन्स क्लबं विपन्न विद्यार्थीपिंत लाकां माेजा इन

येँ – लायन्स क्लब अफ काठमाडौं इन्द्रायणी खुसिबुं बुधवाः चितवन जिल्लाया कालि खोलाय् लाःगु श्री देवीभञ्ज्याङ राष्ट्रिय आधारभूत स्कूलय् वनाः अनया विद्यार्थीपितं स्टेशनरी ज्वलं, मोजा लाकां, तपुली वितरण याःगु खः । थुकिया लिसें स्कुल भिजुअल माध्यमं गुणस्तरीय पठन पाठनया निंतिं ४० इञ्चया स्मार्ट टेलिभिजन छगः नं लःल्हाःगु दु ।

फुक्क धयाथें चेपाङ मस्त जक आखः ब्वनीगु थ्व स्कूलय् वइपिं मस्त लाकां तकं मन्ह्यासे वःगु खनाः लाकां वितरण यानागु खँ क्लबया अध्यक्ष सागर डंगोलं धयादिल । वय्कलं धयादीगु दु, ‘जिपिं थगुने स्कूलय् ब्याग वितरण यायेत वयाबलय् अप्वः थें मस्त लाकां तकं मन्ह्यासे वःगु खना । तसकं दयनीय अवस्थाय् मस्तय्त खनाः जिमि नुगः हे मच्वन, उबलय् हे मस्तय् निंतिं लाकांया व्यवस्था यायेगु क्वःछिना ।’

लायन्स क्लब अफ इन्टरनेशनल ३२५ बी १या एलसीआइएफ लायन बालकृष्ण बुर्लाकोटी मू पाहाँ कथं झायादीगु वितरण ज्याझ्वलय् डिस्ट्रिक गभर्नर मानबहादुर रोकाया, अध्यक्ष डंगोल, सचिव निर्मल महर्जन, दुजः अमर सुवालपिंसं टेलिभिजन लिसें मोजा लाकां, स्टेशनरी ज्वलं, तपुली लःल्हानादीगु खःसा क्लबया दुजःपिंसं मस्तय्त जूस, चकलेट इनाबिउगु खः ।

ज्याझ्वलय् न्ववासें स्कूलया प्रधानाध्यापिका ज्ञानुदेवी पाण्डें थन स्कूलय् दुपिं १३४ म्ह विद्यार्थीपिं मध्ये १३३ म्ह चेपाङ जूगु व छम्ह जक गुरुङ विद्यार्थी दुगु खँ कनादिल । घौछि व बाघौ तक न्यासि वनाः मस्तय् स्कूलय् वइगु खँ कनादिसें वय्कलं थन ब्वंवइपिं अधिकांश विद्यार्थीतय् अभिभावकपिनि बांलाःगु रोजगार मदुगुलिं लाकां न्ह्यायेत तकं समस्या दुगु खँ कनादिल ।

ज्याझ्वलय् न्ववासें अध्यक्ष सागर डंगोलं थःपिंसं थथे मगाःमचाःपिंत ग्वाहालि यायेखनाः तसकं लय्ताःगु खँ कनादिल । क्लबया सचिव निर्मल महर्जनं थ्व स्कूलया अवस्था स्वयाः लिपाथ्यंकं निरन्तर ग्वाहालि याना वनेगु खँ कनादिल ।

 

 

सम्बन्धित बुखँ

LEAVE YOUR COMMENTS