होल्चोया आकाश भैरव द्यः खुया यन

येँ- थनया होल्चोय् च्वंम्ह हल्चोक आकाश भैरव देगलं आकाश भैरव द्यः खुया यंकूगु दु । मंगलबार चान्हय् १२ बजेपाखे देगलय् च्वंपिं निम्ह खुया यंकूगु खः ।

हल्चोक आकाश भैरव गुथिया नायः सागर पुतुवारं ‘नेपालभाषा टाइम्स’ यात कनादीकथं चान्हय् पःखाः गयाः देगलय् दुहां वःपिं न्याम्ह मनूतय्सं अन द्यनीम्ह द्यः पाःलाःयात ख्यानाः द्यः खुया यंकूगु खः । द्यः खूवःपिं न्याम्हेस्यां नं ख्वालय् नकाब पुनातःगु दु । खुँतय्सं मोटरसाइकल ज्वना वःगु खःसा पिने मेपिं खुँत नं पियाच्वंगु खः ।

द्यः खुइगु लागिं खुँतय्सं ताः ई न्ह्यवंनिसें हे योजना दयेकाः वःगु खनेदुगु अनुमान नं पुतुवारं यानादीगु दु । तर ख्वालय् नकाब पुनातःपिं जूगुलिं द्यःपाःलाःनं उमित म्हसीके धाःसा मफुत । उमिसं पाःलाःयात हाल धाःसा स्याना बी धकाः द्यः लिगना यंकूगु खः । खुँतय्सं अन च्वंम्ह धलौटया न्हूम्ह द्यः व करिब ३०० दँ ति पुलांम्ह द्यः छम्ह नं खुया यंकूगु जानकारी वय्कलं बियादिल । न्हूम्ह आकाश भैरव द्यः थनिं च्यादँ न्ह्यः तिनि पलिस्था याःगु खः ।

द्यः खुया यंकेवं अन तःधंगु हल्लाखल्ला जूगु दु । म्हिगः सुथंनिसें हे प्रहरी वयाः अन अनुसन्धान याःगु खःसां बहनी तक छुं न्हूगु खँ लुइके मफुनिगु खँ नं पुतुवारं कनादिल । अन दुम्ह थ्व महत्वपूर्णम्ह द्यः खःसां जात्रा यायेमाःम्ह द्यः धाःसा मखु । यँयाःबलय् हल्चोक आकाश भैरवया सवःभकु प्याखं पिहां वइगु खः ।

सम्बन्धित बुखँ

LEAVE YOUR COMMENTS