खुसिबालं थाय्थासय् डुबान (किपा स्वयादिसँ)
येँ -वंगु छुं न्हि न्ह्यवंनिसें मदिक्क वयाच्वंगु वां यानाः देय्या थीथी थासय् खुसिबाः वयाः बजाः व छेँ डुबानय् लाःगु दु । नापं थुकिं यानाः आपालं थासय् चलः वनाः लँ ठप्प जूगु दु । म्हीग बहनीनिसें वयाच्वंगु वां यानाः सिन्धुपाल्चोक जिल्लाया मेलम्ची आपालं छेँ डुबानय् लाःगु दुसा गुलिखे मनूतय्त खुसिबालं चुइका यंकूगु दु ।
जिल्ला प्रहरी ज्याकू सिन्धुपाल्चोकया कथं मंगलवाः बेपत्ता जूपिं न्हय्म्हेसिया सीम्ह म्हिगः ल्ुइकूगु दु । उकी मध्ये खुम्हेसिया शव म्हसीकेगु ज्या जूगु दुसा छम्हेसिया म्हसीका सीमदुगु खँ धाःगु दु । सीपिं खुम्हं अन ट्राउट न्या लहीगु फर्मय् ज्या यानाच्वंपिं खः ।
प्रहरीया कथं थुकी लानाः हेलम्बुया माधव भण्डारी, गणेश ज्योति, टिकामाया खड्का, ज्ञानेन्द्र कक्षपति समुन्द्र नेपाल व च्याङ्बा तामाङ सीगु खँ धाःगु दु । खुसिबालं यानाः निगू मोटरबेल लिसें बागू दर्जन स्वयां अप्वः ताँ व छेँ चुइके यंकूगु दु । इन्द्रावति व मेलम्ची खुसिबालं अन आपालं धनजनया क्षति जूगु दु ।
खुसिबालं यानाः अनया छेँ नितँजाः तक लखं त्वपूगु खःसा गुलिखे छेँ दुने लानाच्वंपिंत सेनाया हेलिकप्टरं उद्धार यायेगु ज्या जूगु खः ।
उकथं हे खुसिबालं यानाः मनाङय् नं सलंसःखा छेँ डुबानय् लाःगु दुसा आपालं गांलिसे सम्पर्क विच्छेद जूगु दु । मनाङया चामे गां जःखःया निगू खुसिइ खुसिबाः वयेवं खुखा स्वयां अप्वः छेँ मंगलवाः हे चुइके यंकेधुंकूगु दु । मनाङ जिल्लान्यंकं हे खुसिबालं पीडित जुयाच्वंगु दुसा गुलि क्षति जुल धइगु तथ्यांक वयेगु ल्यं दनिगु खँ मनाङ प्रमुख जिल्ला अधिकारी बिष्णु लामिछानें धयादीगु दु । लगातार खुसिबाः वयाच्वंगु कारणं यानाः अन विद्युत आपुर्ति तकं बन्द जुयाच्वंगु दु । खुसिबालं यानाः मनाङ पूर्ण रुपं अस्तव्यस्त जुयाच्वंगु दुसा जलविद्युत गृह व आपालं ताँ चुइका यंकेधुंकूगु दु ।
अथे हे स्याङजाय् नं ख्ुसिबालं च्याखा छेँ पूर्ण रुपं क्षति जूगु दु । अनया गल्याङ नगरपालिकाया सेतीवेणी बजारय् आपालं छेँय् लः दुहां वनाच्वंगु दु । स्याङ्जाया प्रहरीया कथं अन मानवीय क्षति धाःसा जूगु मदु ।
उकथं हे लमजुङय् खुसिबालं झिंप्यखा छेँ चुइकूगु दुसा मतया थां नं चुइका यंकूगुलिं विद्युत आपूर्ति बन्द जुयाच्वंगु दु । अनया सत्या स्वयां अप्वः छेँ जोखिमय् लानाच्वंगु खँ धाःगु दु ।
थ्वहे झ्वलय् सरकारं फुक्कं मन्त्रालययात परिचालन यानाः खुसिबाः व चलखं प्रभावित क्षेत्रय् उद्धार व राहत वितरण यायेगु निर्णय याःगु दु । गृहमन्त्री नेतृत्वया विपद व्यवस्थापन कार्यकारी समितिया म्हिगः च्वंगु बैठकं उगु निर्णय याःगु खः ।
बैठकं खुसिबाः व चलखं पीडितया उद्धार, राहत व जोखिमय् लाःपिंत तत्काल उद्धार यायेगु निर्णय नं याःगु दु ।
फुक्कं किपा – रासस
LEAVE YOUR COMMENTS