श्री शान्ति शिक्षा मन्दिरया ७० क्वःगु वार्षिकोत्सव

येँ – थनया थँहिति त्वालय् च्वंगु श्री शान्ति शिक्षा मन्दिर माध्यमिक विद्यालयं थःगु ७० क्वःगु वार्षिकोत्सव तःजिक हंगु दु । २००७ साल फागुन २० गते प्रजातन्त्रया उदयलिपा थुगु विद्यालय स्थापना जूगु खः । वाङ्मय शताब्दीपुरुष सत्यमोहन जोशीया प्रमुख आतिथ्यताय् जूगु ज्याझ्वलय् विद्यालयया पूर्व विद्यार्थीपिं नेपाल सरकारया पूर्व सचिव रञ्जनकृष्ण अर्याल, नेपाल सरकारया निशान छाप डिजाइन यानादीम्ह नविन्द्रमान राजभण्डारी व थौंकन्हय् ज्ञानोदय मावि. बाफःया प्रधानाध्यापक जुयाच्वनादीम्ह नातिकाजी महर्जनयात दोसल्ला न्ययेकाः हःगु खः । लिसें विद्यालयपाखें शिक्षा हासिल यानाः देय्या थीथी पद व क्षेत्रय् योगदान बियादीपिं पूर्व विद्यार्थीपिंत दोसल्लां न्ययेकाः हंगु खः ।

अथे हे ३८ दँ न्ह्यवंनिसें सेवा याना वयाच्वनादीम्ह शिक्षिका नानीहेरा वज्राचार्य, कर्मचारी सानुबाबु थापा, विद्यालयय् ताःईतक सेवा यानाः थौंकन्हय् सेवा निवृत्त जुयादीधुंकूपिं शिक्षक, शिक्षिकापिंत नं सम्मान याःगु खः । विद्यालयया प्रधानाध्यापक सुदाम गौतमं सछिम्ह हे मदुगु विद्यालयय् सकसिगुं ग्वाहालिं छगू हे शैक्षिक दँय् स्वसःलं मल्याक विद्यार्थीं अध्ययन यानाच्वंगु जानकारी बियादिल ।

विद्यालय व्यवस्थापन समितिया अध्यक्ष लक्ष्मीदास मानन्धरं विद्यालयया न्हूम्ह प्रधानाध्यापकया च्वछायेबहगु कुतलं हे विद्यालयया वातावरण बांलाना वनाच्वंगु धयादिल । मूपाहां जोशीं विद्यालयं म्हो इलय् याःगु प्रगतियात कयाः थःत नं गर्व जूगु धासें थुकथंया सामुदायिक विद्यालयय् नं नेपालभाषा व संस्कृतिया संरक्षण याना वनेमाःगु खँय् बः बियादिल । उगु ज्याझ्वलय् येँ महानगरपालिका शिक्षा विभागया अधिकृत मोतिराज खनाल, सम्मानित व्यक्तित्वपिंसं नं थःथःगु नुगःखँ तयादीगु खः ।

अथे हे ज्याझ्वलय् ०३९ साल ब्याचया विद्यार्थी मचाकाजी महर्जनया संयोजकत्वय् ‘शान्ति शिक्षा मन्दिर मावि पूर्व विद्यार्थी मञ्च’ नं गठन याःगु खः । उगु मञ्चय् राधा श्रेष्ठ, रजनी बज्राचार्य, सागरिका मानन्धर, लीला चौहान, सजन बज्राचार्य, मीरा श्रेष्ठ कायस्थ, सुरेश रेग्मी व राजु बज्राचार्य दुजःकथं च्वनादीगु दु ।

वार्षिकोत्सवया हे झ्वलय् सल्लाहकार समितिया दुजः लक्ष्मीप्रसाद श्रेष्ठं थः मदुम्ह मांया नामं न्यय्छद्वः व व्यवस्थापन समितिया अध्यक्ष मानन्धरं थः मदुम्ह जहानया नापं २ गू लाखया अक्षय कोष स्वनादीगु खः ।