बुंगद्यः विहीवाः यलय् बिज्याकीगु

यल- थौंकन्हय् बुंगय् तयातःम्ह बुंगद्यःयात थ्वहे वइगु षस्थि विहीवाः कुन्हु बुंगं यलय् हइगु जूगु दु । बुंगद्यः खुला बुंगय् व खुला यलय् च्वनीगु परम्परा दु । वंगु मंसिर ९ गते ज्योतिषत च्वनाः स्वःबलय् विहीवाः कुन्हु बुंगद्यःयात यलय् यंकेगु साइत पिहां वःगु खःसा वहे कथं आः विहीवाः यलय् यंकेगु तयारी जूगु खः ।

बुंगद्यःयात बुंगं यलय् यंके न्ह्यः बुंगय् थीथी कथंया पुजा यायेमाःगु चलन दु । थौंकन्हय् थन अज्याःगु हे पुजाआजा जुयाच्वंगु दु । बुंगद्यःयात यलय् यंके न्ह्यः अन ह्यग्रीव भैरव लिसें कुमारीया नं पूज यायेमाःगु चलन दु । यलय् यंके प्यन्हु न्ह्यः द्यःयात लंपुं छायेगु चलन दु । लिसें होम यानाः बलि पुजा समेत यायेमाःगु नं चलन दु ।

बुंगद्यःयात यलय् यंकी कुन्हु सुथय् सांकेतिक रुपं द्यःयात संके माःगु व वयां लिपा खतय् तयाः क्वबिया यंकीगु चलन दु । बुंगद्यःयात गुरुजुया पल्टन समेत च्वनाः च्याम्ह पाञ्जुपिंसं क्वबियाः यंकीगु खः । उकी सुरक्षाकर्मीया नापं स्वनिगःया थीथी थासं वःपिं भक्तजनत नं सहभागी जुइ । बुंगद्यःयात बुंगंनिसें क्वबियाः पैदल हे यलय् थ्यंकी । वयां लिपा यलया तःबहालय् च्वंगु देगलय् बुंगद्यःयात विराजमान याकी ।

थ्व देगलय् खुला तक च्वनेधुंकाः वैशाखपाखे बुंगद्यःया रथ जात्रा जुइ । बुंगद्यःया रथ जात्रायात नेपाःया हे दकलय् ताःहाकःगु जात्राया रुपय् कायेगु याः । रथ जात्रा यानाः जावलाख्यलय् भोटो क्यनाःलि द्यःयात हानं खतय् तयाः बुंगलय् तुं लित यंकी । थौंकन्हय् बुंगय् च्वंगु बुंगद्यःया देगः दनेगु ज्या क्वमचाःनिगु जुयाः अन छगू चीधंगु टहरा दयेकाः द्यःयात तयेगु यानातःगु दु । अन देगः दनेगु ज्या सिधयेत अझ मेगु निदँ ति ई काइतिनिगु खँ धाःगु दु । बुंगद्यःयात वा वयेका बीम्ह सहकालया द्यः माने यानातःगु दु ।

सम्बन्धित बुखँ

LEAVE YOUR COMMENTS