जेठ ४ गते स्थानीय निर्वाचन

येँ – सरकारं २०७९ साल जेठ ४ गते स्थानीय तहया निर्वाचन याकीगु जूगु दु । सरकार व निर्वाचन आयोग दथुइ स्थानीय तहया निर्वाचन वइगु जेठ ४ गते बुधवाः यायेगु समझदारी जूगु खः । स्थानीय तहया निर्वाचन देय्न्यंकं छगू हे चरणय् याइगु जूगु दु ।

म्हिगः प्रधानमन्त्री निवास बालुवाटारय् प्रधानमन्त्री शेरबहादुर देउवा, मन्त्रीपिं व निर्वाचन आयोगया पदाधिकारीपिनि दथुइ जूगु सहलहया झ्वलय् २०७९ जेठ ४ गते स्थानीय तहया निर्वाचन यायेगु समझदारी जूगु खः । सहलहया झ्वलय् प्रधानमन्त्री देउवां जेठ ४ गते निर्वाचन यायेगु प्रस्ताव याःगु खःसा आयोगं उगु हे मितिइ निर्वाचन याये फइगु सुझाव बिउगु खः । सहलहया झ्वलय् प्रधानमन्त्री देउवां सरकारं याकनं हे मिति घोषणा यायेगु धासें निर्वाचनया तयारी न्ह्याकेत आयोगयात इनाप यानादीगु खः ।

सत्तारुढ गठबन्धन दुनेया मतभेदया कारणं सरकारं स्थानीय तहया निर्वाचन क्वःमछिउसे च्वनाच्वंगु खःसा स्थानीय तहया निर्वाचनयात कयाः प्रमुख प्रतिपक्षी दलपाखें समेत सरकारया आलोचना अप्वया वनेवं सत्तारुढ गठबन्धनया वंगु शनिवाः च्वंगु बैठकं चुनाव यायेगु सहमति याःगु खः ।

तर प्रधानमन्त्री देउवां कानुनय् संशोधन मयासे जेठ ४ य् स्थानीय निर्वाचन यायेत अःपुइगु सहमति लिपा आयोगयात सहलहया निंतिं सःतूगु खः । स्थानीय तहया जनप्रतिनिधितय् पदावधि थ्वहे वइगु जेठ ५ गते क्वचाइ । पदावधि क्वचाये न्ह्यः हे निर्वाचन यायेमाःगु कानुनी बाध्यता दु ।

स्थानीय तहया निर्वाचन व्यवस्थापनया नितिं कानुन कथं आयोगयात १२० न्हिया ई माःगु खःसा आयोगं निर्वाचनयात लक्षित यानाः थःगु ज्यायात निरन्तरता बियाच्वंगुलिं जेठ ४ गते निर्वाचन यायेत समस्या मजुइगु खँ धाःगु दु । आयोगं स्थानीय तहया निर्वाचनयात लक्षित यानाः मतदाता नामावली संकलन, मतदानस्थलया पुनरावलोकन व निर्धारणया ज्या पूवंके धुंकूगु दु ।

थ्वहे झ्वलय् निर्वाचन आयोगया प्रवक्ता शालिग्राम शर्मा पौडेलं म्हिगः छगू विज्ञप्ति पिकासें निर्वाचन यायेगु नितिं १२० न्हु आवश्यक जुइगु खःसां मतदाता नामावली लगायतया ज्या निरन्तर जुयाच्वंगुलिं जेठ ४ गते हे चुनाव यायेत थःपिं सक्षम दुगु खँ धाःगु दु । प्रधानमन्त्री देउवा लिसे सहलह लिपा आयोगं उगु पित बिउगु खः । उकथं हे आयोगं थीथी कारणं स्थानीय तहया निर्वाचन छगू हे चरणय् यायेत थःपिं सकारात्मक दुगु खँ नं न्ह्यथंगु दु । लिसें कोभिड–१९ या दथुइ जुइगु निर्वाचनय् स्वास्थ्य मापदण्डया बारे नं सहलह जूगु दु ।

निर्वाचन यायेगु लागिं निर्वाचन आयोगपाखें १२ अर्ब तका दां खर्च जुइगु बजेट नं पेश याःगु दु । आयोगपाखें स्थानीय चुनाव यायेत थुलि दां खर्च जुइ धासें उकिया लागिं बजेट माग याःगु दु ।

सम्बन्धित बुखँ

LEAVE YOUR COMMENTS