ट्राफिक नियम व सीसी क्यामरा
‘हेल्लो ! राजकुमारजी (नां हिलागु) नवानादियागु खःला ?’ छम्ह प्रहरीया फोन वल । ‘हजुर नवाना च्वना ।’ लिसः वल । जि महानगरीय ट्राफिक प्रहरी महाशाखां, छिं छकः थन वयाः क्वथा नं. १० य् नाप लानादिसँ ।’ट्राफिक प्रहरीया फोनं राजकुमार छझाःया निंतिं झसंग वन । छुं गुगुं सवारी साधनयात ठक्कर नकागु मदु, सुं प्रहरीयात छुंकथं नं सम्पर्क तयागु मदु, न त सिफारिस हे यायेत धयागु दु ।
उलिजक मखु सुं ट्राफिक प्रहरीयात म्हसिगु नं मखु, तर आकाझाकां वयाः नाप लायेत धकाः फोन वल । गुकिं यानाः वय्कः अजू चायादिल । ‘ह्याय् ! खइमखु जुइ ! सुुनानं झंगः लायेत फोन याःगु जुइका !’ राजकुमारं थथे हे अनेअनेकथंया विचाः यात । तर विषय थुइकेत गुुगुकथं छटपटी जुयाच्वन । व धाःसा दिउगु हे मखु ।
थः म्हसिउपिं धाक्व पासापिंत फोन यानाः नं न्यन । थःत कल वःगु नम्बरबारे म्हसिउपिं प्रहरीयात न्यनेकने यात । वयां लिपा बल्ल ट्राफिक प्रहरीपाखें हे फोन वःगु खत धइगु खँय् पक्का जुल । फोन धाःसा छाय् वल ले ? थुइकेत हथाय्पथाय् चाचां वय्कः महाशाखाय् थ्यंकादिल ।
अभिलेख स्वस्वं प्रहरीं धाल, ‘का छिं लेन हाचां गायादीगु दु’, ‘जिं गथे यानाः लेन हाचां गाल, जिला छेँय् च्वनाः ज्या यानाच्वनाम्ह मनू ।’, वय्कलं प्रतिवाद यानादिल । ‘पलख आसे न्हैं’, सीसी टिभीया श्रव्यदृश्य मामां खोजतलास व सीसीटिभी कारवाही शाखाया छम्ह प्रहरीं धयादिल ।
वंगु करिब बाःछि न्ह्यः ६ बजे जुयाः १५ मिनेट १० सेकेन्ड वंगु इलय् माइतीघरया लँय् लेन हाचां गाःगु श्रव्यदृश्यय् स्पष्ट खनेदत । वयां लिपा धाःसा वय्कः ख्वाः खिउँकाः रसिद ज्वनाः ट्राफिक कक्षा कायेत वन । थ्व छगू प्रतिनिधि घटना जक खः । ट्राफिक प्रहरी महाशाखाय् थौंकन्हय् न्हिं सलंसः थज्याःगु घटनात वयाच्वंगु दु ।
महानगरीय प्रहरी ज्याकू रानीपुखुलिं छ्वया हःगु अभिलेख मात्तुमालेगु ज्या यायां सीसीटिभी शाखा प्रहरीतय् तसकं लिमलाः ।वंगु छुं दिं न्ह्यः नं शाखाय् उकथं हे फोन यानाः सःतूपिं आपालं मनूतय् भीड मुनाच्वंगु खः । सामान तनाः मालेत वयाच्वंपिं तकं व हे हुलमुलय् ल्वाकज्यायेवं शाखाय् दुपिं निम्ह जक प्रहरीयात गाक्कं तनाव व दबाव लाःगु खने दत ।
जनशक्ति व प्रविधिया अभावया दथुइ नं प्रहरीं उकथंया प्रविधिपाखें सतकय् ट्राफिक नियम हाचां गाःपिं विरुद्ध कारवाही अभियान तीव्र याना हयाच्वंगु दु । न्हापा सतकय् च्वनाच्वंपिं प्रहरीया मिखा छले याये फत धाःसा कारवाहीपाखें पार काये फइगु खः । तर आः धाःसा अथे छले याये खन धाःसां नं सुख मदइगु जूगु दु ।
हरेक मनूया सतकय् हे अभिलेख दइकथं अनुगमन यायेगु ज्या जुयाच्वंगुलिं स्वनिगःया मुख्य सतकय् प्रहरीया मिखा छले यानाः याःगु गल्तीइ तकं कारवाही फयेमालीगु अवस्था वयाच्वंगु दु । प्रहरीया मिखा छले याये फइ तर प्रविधिया मिखा छले याये फइगु सम्भावना मदु ।
‘मखु, जिं अथे यानागु हे मदु, जि खः हे मखु, धकाः वइपिं नं आपालं दु, गुलिं ला ल्वायेत हे स्वइ, तर सीसीटिभी क्यामराया फुटेज खनेवं धाःसा सकलें चुप जुयाः च्वनी’, नियन्त्रण कक्षया छम्ह ट्राफिक प्रहरीं थःगु अनुभव न्यंकादिल । स्वनिगःया मुख्य मुख्य लागाय् ५१४ गः सिसिटिभी क्यामरा संचालनय् दु ।
क्यामराया नियन्त्रक कक्ष महानगरीय प्रहरी ज्याकू रानीपुखुलिइ तयातःगु दु । जडान यानातःगु मध्ये १५१ गः सीसी क्यामरा ट्राफिक प्रहरी महाशाखां हे स्वये फइ । प्रहरीं थ्व हे सीसी क्यामराया माध्यमं कयातःगु श्रव्यदृश्यं नियम हाचां गाःगु सवारी साधनया नम्बर कयाः यातायात व्यवस्था ज्याकू मार्फत सवारी धनीया विस्तृत विवरण काये फइ ।
वयां लिपा प्रहरी टेलिफोन सम्पर्क यानाः सम्बन्धित सवारीधनीयात थःगु ज्याकुथिइ सःती । ‘स्वक्वःतक इमित फोन यानाः सःतेगु ज्या जुइ, मवल धाःसा वयां लिपा पत्राचार यायेगु ज्या जुइ । थथे यानाः नं मवल धाःसा नियन्त्रणय् कयाः प्रमाणसहित कारवाही यायेगु जुइ’ महानगरीय ट्राफिक प्रहरी महाशाखाया प्रमुखलिसें वरिष्ठ प्रहरी उपरीक्षक वसन्त पन्तं कनादिल ।
लिपांगु इलय् स्वला न्ह्यवंनिसें थुकथंया ज्यायात तीव्रता बिया वयाच्वनागु नं वय्कलं कनादिल । मानवीय रुपय् जक ट्राफिक व्यवस्थापनया ज्या चुस्त जुइगु खने मदयेवं प्रविधियुक्त व्यवस्थापनय् प्रहरी लगे जूगु खः ।
LEAVE YOUR COMMENTS