थुगुसी बुद्धकृष्ण बाग श्रेष्ठं म्ये प्वाः खनीगु

थिमि – मध्यपुरथिमि नगरपालिकाया बोडेय् जुइगु म्ये प्वाः खनीगु जात्राय् थुगुसी स्थानीय बुद्धकृष्ण बाग श्रेष्ठं म्ये प्वाः खनीगु जूगु दु । थ्व हे वइगु बैशाख २ गतेकुन्हु बोडेय् जुइगु म्ये प्वाः खनीगु जात्राय् ४६ दँ दुम्ह श्रेष्ठं म्ये प्वाः खनेत्यंगु खः ।
दँदँ न्ह्यवंनिसेंया परम्परायात ल्यंका तयेगु निंतिं थम्हं म्येँ प्वाः खनेत्यनागु थिमिइ च्वंगु नेपाल–कोरिया मैत्री अस्पतालया एम्बुलेन्स चालक श्रेष्ठं कनादीगु दु । थ्व स्वयां न्ह्यः २०६१ सालनिसें ०६४ सालतक लगातार प्यदँ तक म्ये प्वाः खनादी धुंकूम्ह वय्कलं थः मां मदयेवं म्ये प्वाः खना मदीगु खःसा थगुने हाकनं म्ये प्वाः खनादीम्ह वय्कलं खुक्वःखुसी थुगुसी म्ये प्वाः खनादीत्यंगु खः ।बुद्धकृष्ण लिपा ०७५ सालंनिसें ०७२ साल तक जुजुभाई बाग श्रेष्ठं म्ये प्वाः खनादीगु खः । वइगु बैशाख २ गतेकुन्हु न्हिनसिया इलय् कःमि व नाइकें थिमिया थीथी द्यःया पुजा याये धुंकाः बोडेया हे पाँचो गणेद्यःया दक्षिणपाखे च्वंगु फल्चाय् नकःमिं लछि न्ह्यवंनिसें चिकनय् थुनातःगु १० इन्च ताःहाकःगु मुलुं म्ये प्वा खनाबीगु परम्परा दु । म्ये प्वाः खनेधुंकाः म्ये प्वाः खंम्हं चन्द्राकारया भ्वाय् ज्वनाः बोडे देय् चाःहिलेगु परम्परा दु । विश्वय् लोकंह्वाःगु थ्व जात्रा स्वयेत स्वनिगःया थीथी थासं द्वलंद्वः मनूत बोडेय् वनेगु याइ ।