ने. सं. ११४४ कछलागा सप्तमी -

भाषा आयोगया सिफारिस बारे मन्त्रीयात इनाप

येँ – भाषा आयोगं थीथी प्रदेशय् सरकारी ज्याखँया भाषा निर्धारण यासें सरकारयात बिउगु प्रतिवेदन कार्यान्वयन याकेत म्हिगः संस्कृति मन्त्री प्रेम आलेमगरयात नापलानाः इनाप यायेगु ज्या जुल ।

आयोगं सिफारिस याःगु ११ गू भाषालिसे सम्बन्धित खलः पुचःया प्रतिनिधितय्सं मन्त्री आलेमगरयात नापलानाः आयोगया प्रतिवेदन कार्यान्वयन यायेत इनाप याःगु खः ।

भाषा आयोगं बिउगु प्रतिवेदन लःल्हाना काःसां सरकारं आः तक उगु प्रतिवेदन सार्वजनिक तकं याःगु मदुनि । उकिं सरकारं उकियात थःगु कथं नाला कायेत नं भाषिक समुदायया प्रतिनिधितय्सं इनाप याःगु खः ।

११ गू भाषिक समुदायया प्रतिनिधि–तय्सं मन्त्री आलेयात ध्यानाकर्षण पौ लःल्हासें आयोगया प्रतिवेदन कार्यान्वयन यायेगु लागिं भाषा सम्बन्धी कानून दयेकेत इनाप याःगु खः । आयोगया प्रतिवेदनय् आयोगं बिउगु सिफारिसयात कानून दयेकाः जक लागू याये फइ धकाः च्वयातःगु दु । उकिं प्रदेश सरकारयात थुकिया कानून दयेकाः लागू याकेगु लागिं आवश्यक पहल याना बीत नं वय्कःपिंसं मन्त्री आलेमगरयात इनाप याःगु खः ।

११ गू भाषिक खलः पुचःतय्सं थ्व स्वयां न्ह्यः प्रधानमन्त्री शेरबहादुर देउवायात नं थ्व सम्बन्धी ध्यानाकर्षण पौ बीधुंकूगु दु ।

थ्व धुंकाः आः प्रतिनिधिसभाया सांसदतय्त नं नापलानाः थुकिया बारे ध्यानाकर्षण यायेगु तयारी जुयाच्वंगु खँ धाःगु दु ।

भाषा आयोगं याःगु सिफारिस कार्यान्वयन याकेगु सवालय् संघीय सरकारलिसे ११ गू भाषिक समुदायं पहल यानाच्वंगु दुसा प्रदेशय् अन कार्यान्वयन जुइगु भाषिक समुदायतय्सं पहल यानाच्वंगु दु ।