थुकथं सुरक्षित यानातइ शताब्दीपुरुष जोशीया सीम्ह
येँ(रासस)÷ जीवित इतिहासया साक्षीया रुपय् १०३ दँया उमेरय् महाप्रस्थान यानादीम्ह वाङ्मय शताब्दीपुरुष सत्यमोहन जोशीया सीम्हयात अध्ययन अनुसन्धानया निंतिं अस्पतालय् तयातःगु दु । वय्कःया छेँजःया सहमतिकथं मदुम्ह जोशीया सीम्हयात दाहसंस्कार मयासे चिकित्साशास्त्र सम्बन्धी अध्ययनया निंतिं यलया इमाडोलय् च्वंगु किष्ट शिक्षण अस्पतालय् तयातःगु दु ।
अस्पतालया निर्देशक प्रा.डा. सुरज वज्राचार्यं जोशीया सीम्हयात मेडिकल चिकित्सा प्रणालीकथं अध्ययन अनुसन्धानया निंतिं अस्पतालय् तयेगु जानकारी बियादीगु दु । वय्कलं धयादिल, ‘आः जोशीया सीम्ह स्यना मवनीकथं केमिकल व वासः प्रयोग यानाः सुरक्षित रुपय् ‘प्रिजर्भ’ यानातःगु दु । ‘प्रोफेसर’तय् धापूकथं वय्कःया सीम्हयात चीरकालतक गुगुं नं तत्वं स्यंके फइमखु । वय्कःया सीम्हपाखें चिकित्सा प्रणालीअनुरुप गुकथं ज्ञान व सीप काये फइ । व आर्जन यायेगु जुइ ।’
वाङ्मय शताब्दीपुरुष जोशीया सीम्हयात छेँजःपिंसं किष्ट शिक्षण अस्पतालयात पूर्णरुपं लःल्हाःगु दु । ‘चिकित्सा प्रणालीकथं छु छु यायेमाःगु खः, म्हया गुगु भागया अध्ययन, अन्वेषण यायेगु व वय्कःया सीम्हयात चिकित्सकीय प्रणालीइ छु गुकथं प्रयोग यायेगु धइगु विज्ञतय् राय सल्लाहकथं हे न्ह्याः वनेगु जुइ । ‘प्रिजर्भ कन्डिसन’ गुलि ईया निंतिं जुइ आः हे धाये फइगु अवस्था मदु’ वय्कलं धयादिल ।
अस्पतालं न्ह्यथंकथं मदुम्ह जोशीया सीम्हया हरेक भागयात अध्ययन अनुसन्धान याइगु जूगु दु । मदुम्ह जोशीया इच्छाकथं चिकित्सा प्रणालीइ अनुसन्धान जुइ ।
‘जिगु म्हया चिकित्सा प्रणालीकथं अध्ययन जुइमा’ धइगु वय्कःया इच्छा खः, व हे कथं दक्वं अङ्ग प्रत्यङ्गया सूक्ष्मरुपय् अध्ययन अन्वेषण जुइ’ मदुम्ह जोशीया धापूयात उद्धृत यासें अस्पतालया निर्देशक डा. वज्राचार्यं धयादिल । वय्कलं जोशीया बारे चिकित्सा शिक्षा जक मखसे हरेक क्षेत्रय् अध्ययन याये मं दुपिंत अनुसन्धान यायेगु ह्वःतनाः बीगु जुइ धयादिल । मदुम्ह जोशीया सीम्हया बुलुहुं अध्ययनया प्रक्रिया शुरु यायेगु व विशेषज्ञ चिकित्सकतपाखें म्हया हरेक भागया अध्ययन याइगु जूगु दु ।
गन तइ सीम्ह
किष्ट शिक्षण अस्पतालं जोशीया सीम्हयात अस्पताल परिसरया हे आधारभूत साइन्स भवनया हलय् तयेगु निर्णय याःगु दु । अस्पतालया निर्देशक प्रा. डा. वज्राचार्यं जोशीया सीम्ह अध्ययनया निंतिं अस्पतालया बेसिक साइन्स ल्याब दुगु भवनय् तयेगु कनादिल । अस्पतालय् जोशीया सीम्ह तयातःसां सर्वसाधारणं धाःसा स्वये खनी मखु । मेडिकल क्षेत्रया अनुसन्धानकर्तां अनुमति कयाः जक स्वये खनीगु व अध्ययन याये खनीगु निर्देशक वज्राचार्यंं कनादिल । वय्कलं धयादिल, ‘छेँजःपिंसं हे जिमित गोपनीयता व सम्मान स्वरुप तयादिसँ धकाः धाःगु दु । मेडिकल ‘इथिक्स’या नं खँ जुइ ।’
वंगु आइतवाः सुथय् ७ बजे जुयाः ९ मिनेटया इलय् दुःखदु दिवंगत जुयादीम्ह जोशीया चिकित्सा प्रणाली पूवंकाः न्हिनसिया इलय् अस्पतालय् हे बाघौया निंतिं अन्तिम श्रद्धाञ्जलीया निंतिं तःगु खः । अनंलि यल महानगरपालिका प्रांगणय् अन्तिम श्रद्धाञ्जलीया निंतिं सनिलय्तक तःगु खः । थन प्रधानमन्त्री, मन्त्रीगण, थीथी राजनीतिक दलया शीर्ष नेता, साहित्यकार, भाषा ख्यः व शुभेच्छकुपिनिगु आपालं उपस्थिति दुगु खः । मदुम्ह जोशीयात राष्ट्रिय सम्मानलिसें सलामी बियाः अन्तिम विदाइ याःगु खः ।
श्रद्धाञ्जली लिपा छेँजःपिंसं जोशीया सीम्ह किष्ट शिक्षण अस्पतालयात पूर्णरुपं हस्तान्तरण याःगु खः। अन्त्येष्ठि मयाःसां नं थ्व बाहेकं मेमेगु संस्कार विधिपूर्वक याःगु खः । मदुम्ह जोशीया तःधिकःम्ह काय अनुराज जोशीयाकथं थःपिनिगु इच्छाकथं हे थः अबुया सीम्ह अस्पतालयात बियागु खँ वय्कलं धयादिल ।
‘मरणोपरान्त अस्पतालयात अध्ययनया निंतिं सीम्ह दान यायेगु थः अबु (मदुम्ह जोशी)या इच्छाकथं हे च्वया बिउगु खः, जिं नं हस्ताक्षर यानागु दु, व हे कथं सीम्ह अस्पतालयात हस्तान्तरण यानागु दु’, वय्कलं धयादिल, ‘थः अबुया इच्छा ला छुं नं यायेम्वाः धयागु खः, ९९ दँ दुम्ह थः मांया नं व हे कथंया इच्छा दु तर, अन्तिम संस्कार बाहेकंया मेगु संस्कार यायेगु जुइफु । पुरोहितलिसे सल्लाह यानाः ल्यं दुगु ज्या सिधयेकेगु जुइ’ वय्कलं धयादिल ।
LEAVE YOUR COMMENTS