लिच्छवीकालीन चःबिया प्यान लुल

येँ(नेपालभाषा टाइम्स)- थनया छत्रपातिस्थित कन्या मन्दिर परिसरय् छगः हे ल्वहंतय् दयेकातःगु लिच्छवीकालीन ईया चःबिया प्यान लूगु दु । विद्यालय परिसरय् छगः हे ल्वहंतय् दयेकातःगु लिच्छवीकालीन ईया पुलांगु चःबिया प्यान लूगु खः ।

विद्यालय परिसरय् बेवारिस अवस्थाय् तयातःगु उगु प्यान लिच्छवीकालीन जुइमाःगु अनुमान याःसां पुरातत्व विभागं धाःसा मल्लकालीन ईयागु जुइ फुगु खँ न्ह्यथंगु दु । पुरातत्व विभागया पुरातत्व अधिकृत मञ्जरी प्रधानं हनुमानध्वाखा लाय्कू दुने च्वंगु मल्लकालीन प्यानलिसे ज्वःलाःगु खने दुगुलिं उगु प्यान मल्लकालीन जुइफुगु जानकारी बियादीगु दु ।

प्राचीन व मध्यकालीन इतिहास व संस्कृतिविज्ञ मिलनरत्न शाक्यंयाकथं छगः हे ल्वहंया चःबिया उगु प्यान च्यागूगुनिसें झिंनिगूगु शताब्दीया दथुया जुइफुगु खँ धयादीगु दु । थौंकन्हय् कन्या मन्दिर स्कुल दुगु थाय् इखापुखू लागा लिच्छवीकालय् प्राचीन लाय्कू दयेफुगु वय्कःया धापू दु ।

लिच्छवीकालय् लाय्कू लिक्क च्वंगु थँहिति व उकिया जःखःया लागा तिब्बतलिसेया व्यापारिक केन्द्र जूगु शाक्यं धयादिल । विद्यालय परिसरय् लूगु चःबिया प्यान व उगु लागाया अध्ययन याये फत धाःसा लिच्छवीकालीन ईया नगर सभ्यता,लिसें चःबि, धः, सरसफाइ प्रणाली व कृषि उत्पादनय् प्रयोग जुइगु साःया उत्पादन पद्दति बारे नं महत्वपूर्ण तत्थ् सीके फइगु वय्कःया धापू दु ।

थुखे पुरातत्व अधिकृत प्रधानं चःबिया प्यानयात कयाः थप अध्ययन यायेधुंकाः जक उकिया बारे यकिन याये फइगु खँ धयादीगु दु । वय्कलं नं चःबिया प्यान अध्ययनपाखें विगतया चःबि व धःया प्रणाली बारे महत्वपूर्ण तथ्य पित हये फइगु धयादीगु दु ।