ने. सं. ११४६ बछलागा तृतीया -

धिमे पौया अनुसन्धनात्मक च्वसु सम्बन्धी अन्तक्र्रिया

यल (नेपालभाषा टाइम्स)- ज्यापु समाज यलं पिथना वयाच्वंगु धिमय् पौया लेखक, विज्ञापनदाता भेला व अनुसन्धनात्मक च्वसु सम्बन्धी अन्तक्र्रिया ज्याझ्वः मंगलवाः समाजया ज्याकुथि भोलध्वाखाय् जुल । ज्याझ्वलय् न्ववानादिसें समाजया नायः तीर्थलाल महर्जनं स्वनिगःया नेवाःत धमाधम जग्गाजमीन विहिन जुया वनाच्वंगु अवस्थाय् आः गुकथं न्ह्याःवनेमाली धयागु बिचाः सहितया धिमेय् पतिइ वःसा बांलाइगु बिचाः तयादिल ।

‘धिमेय् पति झीगु संस्कृति, भाषा, संस्कार, झीगु ज्ञान विज्ञान सम्बन्धी यक्व च्वसु पिदना वयाच्वंगु दु । आः नेवाःत गुकथं न्ह्याः वनेगु धयागु बारे नं च्वसु वयेमाःथें च्वं’ धासें वय्कलं च्वमिपिंत इनाप यानादिल, ‘नेवाःत स्वनिगलं हे विस्थापित जुइगु अवस्थाय् दु, आर्थिक रुपं लिउने लायेधुंकल जग्गा जमिनविहीन जुया वनेधुंकल । उकिं थज्याःगु अवस्थाय् झीगु गुकथं न्ह्याःवनेमाली धयागु दृष्टिकोण सहितया च्वसु बियादीत इनाप यानाच्वना ।’

अथेहे धिमेय् पौया न्हापांम्ह संयोजक रत्नकाजी महर्जनं धिमेय् पौ पिथनागु अनुभव कनादिसें न्हापा ज्यापु समाजया गतिविधि बारे जानकारी बीत समाजया ख्वाःपौ कथं पिथनागु धिमय् पौ आः म्याग्जिनया रुपय् बांलाक पिदनाच्वंगु खँ कनादिल । थ्व झ्वलय् वय्कलं न्हापा लेख रचना, विज्ञापन कायेत, पत्रिका छापे यायेत ब्वाँय् जुइगु अनुभव कसें उबलय् धिमय् पौ पोखरा तक थ्यंगु खँ कनादिल ।

ज्यापु समाज प्रचार प्रसार उपसमितिया कजि व धिमय्पौया प्रबन्धक निर्देशक विष्णुहरि महर्जनं ज्याझ्वःया उद्देश्य व धिमेय् पौ पिदनाच्वंगुया विवरण न्ह्यब्वयादीगु ज्याझ्वलय् धिमेय् पौया सम्पादक हिराकाजी महर्जन, विभागिय प्रमुख वीरबहादुर महर्जनपिंसं धिमेय् पौ प्रकाशनया सम्बन्धय् खँ तयादीगु खः । द्वैमासिक कथं पिदनाच्वंगु धिमेय् पौ २३ दँ न्ह्यः ने.सं. ११२१ बछलाय् न्हापां ल्याः पिदंगु खःसा आःतक ८६ अंक पिदनेधुंकूगु दु ।

अन्तक्र्रियाय् सहभागीपिंसं धिमे पतिइ पिदनेमाःगु लेखरचना, विज्ञापन, वितरण सम्बन्धी थीथी सुझाव बिउगु खः । ज्याझ्वलय् न्ववानादिसें दया खड्गीं वितरण प्रणाली बांलाकेमाःगु, डा. गौतमवीर वज्राचार्यं चेतना जागृत याइगु लेखत पिदनेमाः धयादिल । अथेहे कुमुद श्रेष्ठं ल्याय्म्हतय् मुँज्या यानाः उमित गज्याःगु इन्ट्रेस्टया विषयय् सहलह यायेमाः धयादिलसा शान्त महर्जनं समीक्षात्मक लेख वयेमाःगु बिचाः तयादिल । अथेहे मीना वज्राचार्यं मस्तय्त नेवाः भाय् स्यने कने याइगु विषयत कःघायेमाःगु बिचाः तयादिल । अथेहे तुयु पुं नं मेमेगु जातियाथाय् नं धिमेय् पौ थ्यंकेमाःगु सुझाव बियादिलसा बाबुराजा ज्यापुं विज्ञापन दाता लेखकतय् बिस्कं बिस्कं भेला यायेमाःगु खँ धयादिल ।

अथेहे जीवनकुमार महर्जनं नियमित स्तम्भत वःसा बांलाइगु खँ न्ह्यथनादिलसा राजेन्द्र महर्जनं दर्शन, अर्थ, नेवाः राजनीति, खेलकूद विषयय् नं लेखत वःसा बांलाइगु बिचाः तयादिल । अथेहे हरि महर्जनं पत्रिकाया ब्वनीपिं सु धयागु म्हसीकाः कन्टेन्टय् हिउपाः हयेमाःगु बिचाः तयादिलसा नवीन थेच्वमिं यल नगरं पिने नेवाः गांया बारे नं अनुसन्धात्मक लेखत पिदनेमाःगु बिचाः तयादिल ।