कर्माचार्यपाखें १६९ क्वः हिदान

येँ-  नेपाल स्वयंसेवी रक्तदाता समाजया केन्द्रीय अध्यक्ष पे्रमसागर कर्माचार्यं १६९ क्वःखुसी हिदान यानादीगु दु । कर्माचार्य पर्वत जिल्लाया कुश्माय् जूगु विशेष ज्याझ्वलय् हिदान यानादीगु खः ।

नेपाल स्वयंसेवी रक्तदाता समाज पर्वत जिल्ला शाखाया ग्वसालय् व नेपाल रेडक्रस सोसाइटी पर्वत जिल्ला शाखाया प्राविधिक ग्वाहालिइ जूगु ज्याझ्वलय् वय्कलं १६९क्वःखुसी हिदान यानादीगु खः ।

पर्वत जिल्लाया कुश्मा नगरपालिका वडा नं. ५ स्थित रेडक्रस सोसाइटीया प्रांगणय् समाजया पर्वत जिल्लाया अध्यक्ष नीरबहादुर पुनया सभापतित्वय् उगु विशेष हिदान ज्याझ्वः जूगु खः ।

नेपाल रेडक्रस सोसाइटी पर्वत जिल्ला सभापति रुद्र रिमाल व समाजया कास्की जिल्ला शाखा उपाध्यक्ष वीरेन्द्र पराजुली पाहांकथं क्वति कयादीगु ज्याझ्वलय् पराजुलीं ३५ क्वःखुसी हिदान यानादीगु खः । ज्याझ्वलय् भारतीय टेलिभिनिज च्यानलपाखें प्रशारण जुइगु रियालिटी शो सारेगमप लिटिल च्याम्पय् अन्तिम न्याम्हय् दुथ्यायेत ताःलाःम्ह अरुण सुनारया नं उपस्थिति दुगु खः ।

थ्व हे झ्वलय् नेकपा (एमाले) रामेछाप काठमाडौं सम्पर्क मंचया ग्वसालय् हिदान ज्याझ्वः जूगु दु ।ब्लड डोनर्स एशोसियसन नेपाल (ब्लोदान) येँ जिल्ल शाखाया समन्वयय् जूगु हिदान ज्याझ्वलय् पीम्हेसिनं हिदान यानादीगु खः ।

थनया अनामनगरस्थित मनोरञ्जन पार्कय् जूगु हिदान ज्याझ्वलय् ब्लोदानया केन्द्रीय पदाधिकारी व दुजःपिनिगु नं उपस्थिति दुगु खः ।

नेपालभाषा टाइम्स

च्वमिया मेमेगु

• पहिचानवादी आन्दोलनय् गोलीप्रहार
• विश्वया न्हयाथाय् च्वंसां नेवाःतय्सं थःगु संस्कृतियात म्वाका वयाच्वंगु दु– प्रम दाहाल
• तिलौराकोटयात नं विश्व सम्पदा धलखय् दुथ्याकीगु
• किपुली बुंगद्यःया झ्वाता पलिस्था विवाद ः वार्ता यानाः हे समाधान मालीगु
• ज्वेल्स सहकारीया वृहत् स्वास्थ्य शिविर