पंजरांया निगू गुथिया सहलह ज्याझ्वः

येँ-उदाय समाजपाखें नेवाः बौद्ध समुदाय दुने तःधंगु बौद्ध पर्व पंजरांया विषययात कयाः छगू सहलह याःगु दु । उदाय समाजपाखें नीस्वनातःगु उदाय म्युजियमपाखें उगु ज्याझ्वः याःगु खः । मरु त्वाःया तबःतय् तःचतं व केल त्वाःया कसाःतय् पंजरां गुथियात केन्द्रीत यानाः उगु सहलह ज्याझ्वः याःगु खः । भर्चुअल माध्यमं जूगु ज्याझ्वलय् राजगुरुजु मञ्जुश्रीरत्न वज्राचार्यं पंजरां व नेवाःतय्सं न्ह्याका वयाच्वंगु थीथी गुथि पर्वया बारे नुगःखँ तयादीगु खः ।

राजगुरुजु वज्राचार्यंं पंजरांया दिंकुन्हु पंजरां बीबलय् पंचशील पालना यायेगु जक मखसे पंचशीलय् च्वनाः हे दान बीमाः धयादिल । थौंकन्हय् आपालं बौद्ध धार्मिकस्थलय् हिन्दू द्यः पलिस्था यायेगु ज्या जुयाच्वंगु खँय् नं वय्कलं दुःख प्वंकादिल ।

लिसें वय्कलं धर्म संस्कृतिया रक्षा यायेमाः धइगु वाःचायेकाः पंजरां काः वइपिं गुरुजुपिनिगु ल्याः नं अप्वया वनाच्वंगु खँ कनादिल । तःचतं गुथिया स्वतन्त्रबहादुर ताम्राकारं पंजरांबलय् न्यान्हु न्ह्यव निसें थःपिंसं तयारी यायेमाःगु जानकारी बियादिल । पंजरां छन्हु न्ह्यः द्वादशिकुन्हु दान प्रदान यायेगु सकतां ज्वलं स्वनाः पुजा यायेमाःगु व पंजरां बीत दयेकीगु मन्दः हे वास्तविक काष्ठमण्डप जूगु धारणा तयादिल ।

पंजरांबलय् न्याताजि हे दान यायेमाःगु न्हापांनिसेंया परम्परा दुगु व थथे थःपिनिगु गुथिपाखें दान यायेबलय् फछि न्ह्यंगु गुलुपाःलय् तयाः दान यायेमाःगु चलन दुगु जानकारी बियादिल ।
पंजरां गुथिया मैत्रीमान कंसाकारं थःपिनिगु गुथिपाखें पंजरां न्यान्हु न्ह्यवः प्यंग किसलिं तयाः नागयात पुजा यायेमागु चलन दुगु खँ कनादिल । थथे नाग पुजा यायेबलय् लैनचौर, बागदरवार, मिनाथ व जमःया नागयात पुजा याइगु खँ कनादिल ।

पंजरांबलय् यायेमाःगु ज्या पाः ब्यंम्ह, पाःलाःम्ह व आकिवं पाः काइम्ह स्वम्हेसिनं याइगु खःसां गुलः मरि छुइबलय् धाःसा गुथ्याःत सकलें च्वनाः याइगु खँ कनादिल । उदाय म्युजिमया कजि डा. सुमनकमल तुलाधरं लसकुस यासें वक्तापिनिगु म्हसीका बियादीगु ज्याझ्वलय् ज्याझ्वलय् एलिना ताम्राकार व नरेन्द्र कंसाकारं नं थःथःगु नुगःखँ तयादीगु खः ।