यलय् छेँ मिं नयाः मदुपिनि छेँजःयात ग्वाहालि यायेत समिति

यल- वंगु म्हपुजा कुन्हु थनया चक्रबहिली छेँ मिं नयाः प्यम्ह दुजःपिं सीगु परिवारयात आर्थिक ग्वाहालि बीगु लागिं स्थानीय त्वाःबाहाःपिंसं समिति गठन यानाः ज्या न्ह्याकूगु दु ।

वय्कःपिंत आर्थिक ग्वाहालिया लागिं सीडीओ कार्यालय, महानगरपालिका आदि थासय् स्वापू तयेगु ज्या नं जुयाच्वंगु दु । ग्वाहालिया लागिं कोष दयेकेत यलया ताम्राकार समाजपाखें छगू लाख तका दां ग्वाहालि याःगु दु । आर्थिक ग्वाहालिया लागिं जिल्ला देैवी प्रकोपय् नं स्वापू तयेगु ज्या जुयाच्वंगु खँ धाःगु दु ।

उगु छेँय् मिं नयाः ७१ दँ दुम्ह लक्ष्मीकृष्ण ताम्राकार, वय्कःया म्ह्याय् ४० दँया अञ्जना ताम्राकार, ३४ दँया भौ रञ्जना ताम्राकार व ८ दँया छय् निर्जल ताम्राकार मदुगु खः । मदुपिं प्यम्हेसितं वंगु आइतवाः कायम्ह निरोज ताम्राकारं मि तःगु खः ।

छेँ मिं नयाः च्वने तकं मजिउगुलिं दुःखं कःपिं सकलें आः पशुपतिया क्रियापुत्री घरय् च्वनाच्वंगु दु ।

उगु घटनाय् झ्यालं तिन्हुया वःम्ह निरोज ताम्राकार बचे जूगु खः । प्यतजाः दुगु झ्यालं तिन्हुया वःम्ह निरोजया मेम्ह केहेँ सिर्जना ताम्राकारया धाःसा तुति फ्याक्चर जूगु दु । सिर्जनाया उपचार खर्च यल महानगरपालिकां व्यहोरे यायेगु खँ मेयर चिरिबाबु महर्जनं कनादीगु दु ।

वय्कःपिंत राज्यपाखें नं छुं कथंया ग्वाहालि याये मालीगु सः थ्वयाच्वंगु दु । मिं नयाः छेँया निगू तल्ला च्वने हे मजीक क्षति जूगु दुसा छेँय् च्वं वनेगु लागिं नं नितँजाः बांलाक हे दयेकेमाःगु खनेदु । आर्थिक स्थिति खास हे क्वातु मजूगु कारणं थुकिया लागिं नं वय्कःपिंत ग्वाहा लि आवश्यक जुइगु खँ धाःगु दु ।

म्हपुजा कुन्हु वय्कःपिं बैगलय् च्वनाः म्हपुजा यानाच्वंगु इलय् कुने मिं नःगु खः । अन च्याकातःगु पाल्चां पर्दा मिं नयाः लिपा छेँ छखां न्यनावंगु धाःसां वास्तवय् मिं नःगुया खास कारण अझं सी मदुनि धाःगु दु । मि तच्वः जुइधुंकाः अन तयातःगु ग्यास सिलिण्डर मुया वःगु खःसा उकी लानाः अप्वः क्षति जूगु खः ।

सम्बन्धित बुखँ

LEAVE YOUR COMMENTS