येँ महानगरया ७ क्वःगु नगरसभा क्वचाल
येँ (नेपालभाषा टाइम्स) – येँ महानगर पालिकाया वंगु असार ४ गतेनिसें न्ह्याःगु न्हय्क्वःगु नगरसभा क्वचाःगु दु। न्हय्क्वःगु नगरसभाया प्यक्वःगु बैठकं विनियोजन विधेयक व वार्षिक बजेटलिसें कार्यक्रम सर्वसम्मतं पारित नं याःगु दु ।
असार ४ गतेनिसें शुरु जूगु महानगरया न्हय्क्वःगु नगरसभाय् न्हापांगु न्हिकुन्हु येँ महानगरपालिकाया प्रमुख विद्यासुन्दर शाक्यं नीति तथा कार्यक्रम न्ह्यब्वयादीगु खःसा उकुन्हु हे च्वंगु निगूगू बैठकय् नीति तथा कार्यक्रमयात कयाः सहलह नं याःगु खः ।
वयां लिपा असार १० गते च्वंगु मेगु बैठकय् महानगर प्रमुख शाक्यं आर्थिक विधेयक व उपप्रमुख हरिप्रभा खड्गी श्रेष्ठं वइगु आर्थिक दँया महानगरया बजेट व विनियोजन विधेयक न्ह्यब्वयादीगु खः ।
अनंलि असार १८ गते च्वंगु स्वक्वःगु बैठकय् आर्थिक विधेयकय् व्यापक सहलह यानाः पारित याःगु खःसा असार २१ गते च्वंगु लिपांगु बैठकय्ब जेट, कार्यक्रम व विनियोजन विधेयकय् सहलह यानाः पारित याःगु खः ।
बैठकया स्वंगूगु, प्यंगूगु व न्यागूगु सुचीइ लेखा समितिया संयोजक ध्रुवप्रसाद त्रिपाठी, न्यायिक समितिया दुजः सरोज ढकाल व सुशासन समितिया संयोजक हुमादेवी आचार्यं न्ह्यब्वयादीगु प्रतिवेदन व्यापक सहलह लिपा पारित याःगु खः । खुगूगु सुचीइ विविध विषय दुथ्याकातःगु खः ।
बैठकया कार्यसूचीइ विविधलिसें खुगू विषय दुथ्याकातःगु खः । न्हापांगु सुचीइ आर्थिक दँ ०७७-०७८या वार्षिक बजेट व कार्यक्रमय् सहलह व पारित यायेगु दुथ्याकातःगु खःसा निगूगु विनियोजन विधेयकयात कयाः दफावार सहलह यानाः पारित यायेगु खः ।
थुपिं निगुलिं कार्यसूचीइ नगरसभाया नीम्हेसिनं थःथःगु सुझावलिसें धारणा तयादीगु खः । नगरसभाय् सदस्यपिंसं वडास्तरय् योजनासहित येँया समृद्धियानिंतिं पहिचान व कलात्मक योजना दयेमाःगु, भौतिक, सामाजिक, आर्थिक विकास, व्यवस्थापन, वातावरणीय सुधारया निंतिं सन्तुलित कार्यक्रम हयेमाःगु, सम्पदाया नां भिंकेमाःगु, वडा भवनया निंतिं जग्गा,सतक, धः व त्वनेगु लःया प्रणालीयात सुधार यायेगुयात प्राथमिकता बीमाःगु लगायतया धारणा तयादीगु खः ।
सभाया दकलय् लिपा सभाया अध्यक्षलिसें महानगर प्रमुख शाक्यं सदस्यपिंसं बियादीगु सुझाव संशोधनसहित विधेयक सर्वसम्मतं स्वीकृत जूगु जानकारी सभायात बियादीगु खः । सभाय् उपाध्यक्षलिसें उपप्रमुख हरिप्रभा खड्गी, वडाअध्यक्ष, कार्यपालिकाया दुजःनापं नगरसभा सदस्यपिं ईश्वरमान डंगोल, दीपक केसी, नवराज पराजुली, शोभा सापकोटा, नवीन मानन्धर, मचाराजा महर्जन, उदयचुडामणि वज्राचार्य, रमिताकमल स्थापित वडा सदस्यपिं जीवन मानन्धर, कमला महर्जन, उत्तम शर्मा, आनन्द गौतम लगायतं थःथःगु सुझाव व धारणा तयादीगु खः ।
LEAVE YOUR COMMENTS