येँ मनपां पार्किङया निंतिं विकल्प मालीगु

येँ – येँ महानगर लागा दुने सवारी साधन पार्किङया निंतिं उपयुक्त थाय् मालेगु ज्या न्ह्याःगु दु । येँ महानगरपालिकां दिगो, सरल व उपयुक्त सवारी साधन पार्किङया निंतिं विकल्पया रुपय् थाय् मालेगु शुरु याःगु खः । स्वनिगलय् थौंकन्हय् सवारी साधन पार्किङ तःधंगु समस्या जुयाच्वंगु दु । स्वनिगःया अतिकं व्यस्त बजाःजक मखसे अस्पताल, क्याम्पस लगायतया थीथी थासय् तकं सवारी पार्किङया अभावं लँय् हे पार्किङ यायेमाःगु अवस्था ब्वलनाच्वंगु दु ।

उकिं यानाः घन्टौतक सवारी जाम जुइगु स्थिति नं वयाच्वंगु दु । विशेषयानाः सुथय् व सनिलय् ज्याकू वनेगु व लिहां वयेगु इलय् थ्व समस्या अप्वः खने दयाच्वंगु दु । उकिसनं लँय् छुं गुगुं घटना जुल वा जुलुस,¥याली पिथनेगु ज्या जुल धाःसा स्वनिगःया सतक छगुलिं हे अस्तव्यस्त जुइगु यानाच्वंगु दु । थ्व हे खँयात ध्यानय् तयाः मनपां सवारी पार्किङया निंतिं विकल्प मालेगु ज्या न्ह्याकूगु खः ।

येँ मनपां थन ग्वसाः ग्वःगु छगू अन्तक्र्रियात्मक ज्याझ्वलय् नवासें येँ मनपाया प्रमुख विद्यासुन्दर शाक्यं स्वनिगःया दकलय् तःधंगु समस्या मध्ये छगू सवारी साधनया व्यवस्थापनया निंतिं येँ महानगरपालिकां मेगु विकल्प मालेगु ज्या न्ह्याकाच्वंगु जानकारी बियादिल । वय्कलं धयादिल, ‘स्वनिगलय् गुलि नं सवारी साधन दु, उकी मध्ये औसतय् १० प्रतिशत ई ज सतकय् चले जुइ, ल्यं दुगु दक्वं सवारी साधन पार्किङ जुयाच्वनी ।

अज्याःगु पार्किङ यानातइगु सवारी साधनं हे सवारी व्यवस्थापन यायेत समस्या जुयाच्वंगु खः ।’स्वनिगःया अप्वःगु सवारी साधनयात व्यवस्थापन याये मफुगुलिं सामान्य जीवन पद्धति व सहरी सुविधाय् तकं समस्या जूगु सरोकारवालातय् धापू दु । जीवन पद्धति व सहरी सुविधा उपलब्ध यायेगुलिइ समस्या वःगु धइगु विज्ञ व सरोकारवालातय् धापू लिपा येँ मनपां सम्बन्धित ख्यःयापिं नापं पार्किङ योजनायात कयाः सहलह याना वयाच्वंगु दु ।

अन्तक्र्रियाय् येँ मनपाया प्रमुख प्रशासकीय अधिकृत यादवप्रसाद कोइरालां तत्कालया निंतिं समाधान मालेगु मखसे न्ह्याबलेंया निंतिं सुविधा उपभोग याये फइकथं सतक व ट्राफिक व्यवस्थापनया ज्या न्ह्याकेमाः धयादिल ।

सम्बन्धित बुखँ

LEAVE YOUR COMMENTS