ने. सं. ११४६ अनलाथ्व पुन्हि -

महानगरयात प्राप्त स्वास्थ्य सामग्री निगू अस्पतालयात

येँ (नेपालभाषा टाइम्स) – येँ महानगरपालिकां निगू अस्पतालयात कोरोना परीक्षण यायेगु मेसिनलिसें अत्यावश्यक स्वास्थ्य सामग्री लःल्हाःगु दु। येँ मनपां चिकित्स विज्ञान राष्ट्रिय प्रतिष्ठान वीर अस्पताल व परोपकार प्रसूती तथा स्त्री रोग अस्पतालयात उगु स्वास्थ्य सामग्री लःल्हाःगु खः ।

येँ मनपालिसे भगिनी सम्बन्ध दुगु चीनया तिब्बत स्वशासित क्षेत्रय् च्वंगु ल्हासा नगरं अनुदान स्वरुप बिउगु स्वास्थ्य सामग्री येँ मनपां निगू अस्पतालयात लःल्हाःगु खः । उगु स्वास्थ्य सामग्री तिब्बतं खासा जुयाः तातोपानी व अनंलि सिन्धुपल्चोक जुयाः येँय् थ्यंके हःगु खः ।

येँ महानगरपालिकाया प्रमुख विद्यासुन्दर शाक्या उपस्थितिइ १४ गू लाख ९९ हजार ३७५ युआन (करिब २ गू करोड ५७ गू लाख २९,२७५ तका) बराबरया स्वास्थ्य सामग्रीमध्ये वीर अस्पतालयात स्वचालित न्युक्लेइक एसिड एट्राक्सन मेसिन १ गः, न्युक्लेइक एसिड एट्राक्सन रिएजेन्ट ३०००, भिटिएम १५००, आरडीटी १५००व पीपीइ ५०० लःल्हाःगु खः ।

थुकथं हे प्रसूती अस्पतालयात पीसीआर मेसिन छगः, भिटिएम १५००, आरडीटी १५०० व पीपीइ ५०० थान लःल्हानागु येँ महानगरपालिका सहरी स्वास्थ्य महाशाखाया प्रमुख नरेन्द्र विलास वज्राचार्यं जानकारी बियादीगु दु। स्वास्थ्य सामग्री लःल्हायेगु झ्वलय् येँ मनपा प्रमुख शाक्यं आःया अवस्थाय् थ्व पर्याप्त ग्वाहालि मखुसां उपलब्त्र स्रोत व साधनया उच्च प्रयोग यानाः फक्व अप्वःयात सेवा बीत इनाप यानादिल ।

‘येँ मनपालिसे भगिनी सम्बन्ध दुगु ल्हानापाखें अनुदानकथं वःगु स्वास्थ्य सामग्री स्वास्थ्य मन्त्रालयलिसे समन्वय यानाः निगू अस्पतालयात लःल्हानागु जुल’, येँ मनपा प्रमुख शाक्यं धयादिल, ‘वइगु दिनय् नं जिमिसं ग्वाहालि यायेगु जुइ ।’ उगु इलय् वीर अस्पतालया निर्देशक डा. केदारप्रसाद सेन्चुरी, प्रसूतीगृहया निमित्त निर्देशक डा. सन्दीप पौडेलं महानगरपालिकां थप ग्वाहालि याइगु आशा यासें प्राप्त सामग्रीपाखें अस्पतालयात तःधंगु राहत चूलाःगु विचाः प्वंकादीगु खः ।

उगु स्वास्थ्य सामग्री थ्व हे वंगु असार ११ गते तातोपानी नाकाय् च्वंगु मितेरी पुलय् ल्हासा नगरया विदेश विभाग प्रमुख झान जियांगया पुचलं येँ महानगरपालिका अन्तर्राष्ट्रिय सचिवालय व विपद व्यवस्थापन विभागया अधिकारीयात लःल्हाःगु खः । निगू अस्पतालयात लःल्हानाः नं ल्यं दुगु छुं छुं सामग्री महानगरपालिका थम्हं हे प्रयोग यायेगु महाशाखां न्ह्यथंगु दु ।