बजारय् लुँया हाहाकार

लुँ न्यायेगु मदयाः लुँवहः व्यवसायीया व्यापार प्रभावित

येँ – पहाडी हिन्दू मिसापिनि तःधंगु नखः तीज व वयां तुरुन्त लिपा वइगु मोहनि न्ह्यःने वयाच्वंगु इलय् तकं थनया बजारय् धाःसा लुँया अभाव जूगुलिं लुँ व्यवसायीत हैरान जुयाच्वंगु दु । बजारय् माग वयाच्वं कथं लुँ न्यायेगु मदुगुलिं लुँ व्यवसायीतय्सं राष्ट्र बैंकयात लुँ अप्वः बजारय् पित बी माल धकाः इनाप याःगु दु ।

थौंकन्हय् राष्ट्र बैंकं न्हिं २० किलो लुँ पित बीगु यानाच्वंगु दु । तर बजारय् धाःसा न्हिं ४० किलो लुँया माग दुगु खँ व्यवसायीतय्सं धाःगु दु ।
नेपाल सुनचाँदी व्यवसायी संघया नायः मणिकरत्न शाक्यं बजारय् थौंकन्हय् लुँया माग न्हिं ४० किलो धइथें दु, तर राष्ट्र बैंकं धाःसा न्हिं २० किलो जक लुँ पित बीगु यानाच्वंगुलिं लुँया हाहाकार जुयाच्वंगु दु ।

माग कथं लुँ पित मबिउगु कारणं थौंकन्हय् राष्ट्र बैंकयात व्यवसायीतय्सं न्हिं २० किलोया पलेसा न्हिं ३५ किलो लुँ पित बीगु याये माली धकाः इनाप यानाच्वंगु दु । राष्ट्र बैंकं लुँयागु थ्व कोटा बढे याइ वा याइ मखु धइगु खँ धाःसा सी मदुनि । बजारय् लुँया अभाव जुयाच्वंगु खँ राष्ट्र बैंकं सिउसां नं उकिया बारे निर्णय यायेत बैंकया कार्यविधि हे संशोधन याये मानिगु जूगुलिं छुं धाये मफइगु खँ धाःगु दु ।

तर लुँया माग अप्वयेके माली धइगु खँय् राष्ट्र बैंकय् सहलह धाःसा जुयाच्वंगु खँ धाःगु दु । बजारय् राष्ट्र बैंकं कम जक लुँ बीगु याःसां खास यानाः विदेशं नेपाः दुहां वइपिं ज्यामितय्सं ज्वना वइगु लुँपाखें नं बजारय् लुँया अभाव पूर्ति जुइगु खः ।

तर सरकारं विदेशं ज्वना वइगु लुँइ नं भंसार लगे याना बीवं अज्याःगु लुँ नं बजारय् वयेगु बन्द जुयाच्वंगु दु । अथे हे थौंकन्हय् सर्वसाधारण मनूतय्सं छेँय् च्वंगु लुँ बजारय् हयाः मीगु ज्या नं भाः कुहां वःगु जुयाः बन्द याना तःगुलिं बजारय् झन् हे लँु अभाव जुयाच्वंगु दु ।

तस्करीया सम्भावना अप्वल

बजारय् लुँया हाहाकार जुयाच्वंगुलिं आः हानं तस्करीया लुँ दुहां वये फइगु सम्भावना अप्वया वःगु खँ व्यवसायीतय्सं धाःगु दु । सरकारं तस्करीया लुँ पनेगु ज्याय् कडाई याना तःगु कारणं थौंकन्हय् तस्करीया लुँ बजारय् वयेगु बन्द जुयाच्वंगु दु ।

तर थ्व बजारय् लुँ अभावं यानाः आः हानं तस्करीया लुँ दुहां वयेगु सुरु जुइ फइगु खँ लुँवहः व्यवसायी तेजरत्न शाक्यं कनादीगु दु । यदि सरकारं याकनं हे लुँया आपूर्ति अप्वयेकेगु ज्या मजुल धाःसा तस्करीपाखें लुँ हइपिंत प्रोत्साहन जुइगु खँ कनादीगु दु । वंगु छुं ई न्ह्यवंनिसें तस्करीया लुँ वयेगु बन्द जुयाच्वंगु दु ।