किपूया बाखनय् चिहाः संकिपा धेंधेंबल्लाः जुइगु

किपू – किपूया म्हसीका न्ह्यब्वयेगु कथं चीहाः संकिपा धेंधेंबल्लाः कासा जुइगु जूगु दु । किपू नगरपालिकाया ग्वसालय् थ्व धेंधेंबल्लाः कासा जुइत्यंगु खः । आइतवाः नेपालभाषाया संकिपाकःमिपिनि भेलाय् किपूया मेयर रमेश महर्जनं धेंधेंबल्लाःया घोषणा यानादीगु खः ।

भेलाय् न्ववानादिसें वय्कलं किपूया इतिहास, नखःचखः, संस्कृति, संस्कार, जात्रा पर्व, लजगाः आदिइ दुसुलाच्वंगु बाखंयात संकिपाया माध्यमं न्ह्यब्वयाः किपूयात पर्यटकीय क्षेत्रय् रुपय् प्रचार प्रसार यायेगु ताः तयाः चिहाः संकिपा धेंधेंबल्लाः यायेत्यनागु खँ धयादीगु खः ।

किपू चिहाः संकिपा धेंधेंबल्लाः कासाया कजि लक्ष्मीकुमार महर्जनं किपुलिइ संकिपा दयेकेबहःगु यक्व हे जात्रा पर्व, संस्कृति, इतिहासया न्यँकं बाखं, किवंदन्ती दुगु खँ न्ह्यथँसें थज्याःगु बाखनय् आधारित जुयाः चिहाः संकिपा दयेकाः धेंधेंबल्लाखय् ब्वति कायेफइगु खँ कनादिल । वय्कलं धेंधेंबल्लाखय् ब्वति कायेगु नियम बारे नं जानकारी बियादीगु खः ।

धेंधेंबल्लाःया मूमू नियम कथं चिहाः संकिपा किपूया म्हसीका न्ह्यब्वइगु जुइमाःसा संकिपा अप्वलय् झिंन्यागू मिनेट तकया जुइमाः । भेलाय् वय्कलं संकिपा निंतिं आवश्यक बाखं बारे जानकारी बिइगु निंति डा. चन्द्रमान वज्राचार्य, प्रयागराज प्रधान थेंज्याःपिं ं किपूया संस्कृतिविद्, इतिहासकारपिं तयार दुगु खँ धयादीगु खः ।

वय्कलं किपूया बारे न्यनेकने यायेत वय्कःपिंत स्वापू तयेफइगु जानकारी नं बियादिल । थुगु धेंधेंबल्लाःया निंतिं न्हाप सिरपाः छगू लाख तका, लिउ ७५ द्व तका, लियांलिउ ५० द्व तका व निगू संकिपायात हःपाः कथं २५÷२५द्वः तका बिइगु खँ धाःगु दु । अथेहे धेंधेंबल्लाखय् दुथ्याःगु दक्वं संकिपायात झिद्वः–झिद्वः तका नगरपालिकां उपलब्ध याकीगु खँ नं धाःगु दु ।

 

सम्बन्धित बुखँ

LEAVE YOUR COMMENTS