आः आरआर क्याम्पसय् नं नेपालभाषा एमए

येँ- आः थनया आरआर क्याम्पसय् नं नेपालभाषा विषय कयाःएमए तगिं ब्वने दइगु जूगु दु । थुकिया लागिं आइतवाःनिसें फाराम काये फइगु खँ धाःगु दु ।

आरआर क्याम्पसय् नं नेपालभाषा एमए तगिंया कक्षा तयेकेगु लागिं अन हे ब्वनीपिं नेवाः विद्यार्थीतय्गु संस्था नेवाः विद्यार्थी युनियनं कुतः याना वयाच्वंगु खः । अन बन्द जुइधुंकूगु बीए तगिंया नेपालभाषा कक्षा छुं दँ न्ह्यः तिनि हानं सञ्चालनयाःगु खः ।

आः आरआर क्याम्पसय् नियमित रुपं शुरु जुइत्यंगु एमए तगिमय् पाटन क्याम्पस दुनेया नेपालभाषा केन्द्रीय विभागय् ब्वनाच्वंपिं विद्यार्थीत नं क्याम्पस परिवर्तन यानाः वये फइगु खँ धाःगु दु । उकिया लागिं विद्यार्थीतय्सं डीन कार्यालयय् छगू निवेदन बीमाःगु व्यवस्था यानातःगु दु ।
केन्द्रीय विभागय् थुगुसी न्हापांगु सेमेस्टर ब्वनेत भर्ना जूवःपिं विद्यार्थीतय् ल्याः ५० म्ह स्वयां अप्वः थ्यंगु खः । थुकिं यानाः अन सेक्सन ब्वथले मालीगु अवस्था पिहां वःगु खः ।

येँ महानगरपालिकां येँ देय् दुनेया सरकारी व निजी स्कुलय् नेपालभाषाया माध्यमं स्थानीय विषय ब्वंकेगु व्यवस्था यायेवं उच्चशिक्षाय् नेपालभाषा कयाः ब्वनीपिं विद्यार्थीत नं अप्वःगु खः ।