प्रधानन्यायाधीशयात महाभियोग तयेगु खँ मजूनि ः दाहाल
येँ – नेकपा माओवादीया अध्यक्ष पुष्पकमल दाहालं प्रधानन्यायाधीश चोलेन्द्र शम्शेर जबरा लिसे स्वानाच्वंगु न्यायालय सम्बन्धी विवाद छन्हु निन्हुया दुने क्वचाइगु खँ धयादीगु दु । चितवनया भरतपुर विमानस्थलय् म्हिगः पत्रकारतलिसे खँ ल्हासें दाहालं धयादिल, ‘म्हिगः जिपिं गठबन्धनया स्वंगू दल च्वनाः थुकिया बारे सहलह याना, आः न्यागुलिं दल च्वनाः छन्हु निन्हुया दुने छगू विन्दुइ थ्यंकेगु जुइ ।’
पत्रकारतय्सं प्रधानन्यायाधीश जबरायात महाअभियोग तयेगु सम्भावना दु कि मदु धकाः न्यंगु न्ह्यसःया लिसे बिसें दाहालं धयादिल, ‘महाअभियोगया चर्चा जूगु मदुनि ।’ वय्कलं गजेन्द्र हमालयात मन्त्री नियुक्त यायेधुंकाः शुरु जूगु विवाद हमालं राजीनामा बीधुंकाः नं तच्वया वनाच्वंगु धासें न्यायालयया स्वतन्त्रताय् गनं नं गुगुं नं कथंया किचः लाके मजिउगु खँ नं धयादीगु दु ।
थ्वहे झ्वलय् नेपाली कांग्रेसया वरिष्ठ नेता रामचन्द्र पौडेलं प्रधानन्यायाधीया बारे थःपिंत चिन्ता जुयाच्वंगु खँ धयादीगु दु । म्हिगः सिंहदरवारय् च्वंगु कांग्रेस संसदीय दलया ज्याकुथी सञ्चारकर्मीत लिसे खँ ल्हासें पौडेलं न्यायालयय् ब्वलंगु असहज परिस्थिति चिन्ताजनक खः धासें थःपिंसं राजनीतिक हस्तक्षेप यायेत धाःसा मयःगु खँ नं धाःगु दु । वय्कलं धयादिल, ‘प्रधानन्यायाधीशया बारे जिमित चिन्ता दु, न्यायालयय् गुगु कथंया असहज परिस्थिति ब्वलंगु दु, व न्यायालयया आन्तरिक मामिला खः, जिमिसं राजनीतिक हस्तक्षेप याये चाहे मजुया, तर थ्व चिन्ताजनक खः ।’
उकथं हे नेकपा एमालेया अध्यक्ष केपी शर्मा ओलीं परमादेश जारी याःपिं न्याम्हं न्यायाधीशतय्सं राजीनामा बीमाःगु खँ धयादीगु दु । एमालेया पालिका अधिवेशनयात सम्बोधन यासें वय्कलं उगु खँ धयादीगु खः ।
अध्यक्ष ओलीं धयादिल, ‘पाकिस्तानी शैलीइ परमादेशपाखे सरकार गठन जुइधुंकाः थौं सर्वोच्च अदालतय् समस्या खनेदुगु खः, श्रीमान न्यायाधीशपिंसं सुनां सुनां छु याःगु दु, भचा खुले जूगु दु, छम्हेस्यां जक मखु परमादेश न्याम्हेस्यां सर्वसम्मत फैसला याःगु मखुला, छम्हेस्यां जक छाय् राजीनामा बीगु ? न्याम्हेस्यां राजीनामा बीमाःगु मखुला ? सर्वसम्मन निर्णयया सुगन्ध व दुर्गन्ध गज्याःगु खः ?’
वंगु असार २८ गते प्रधान्यायाधीश जबरा नापं न्यायाधीशपिं दिपककुमार कार्की, मीरा खड्का, ईश्वरप्रसाद खतिवडा, डा. आनन्दमोहन भट्टराईया इजलासं संसद पुनस्र्थापना यासें शेर–बहादुर देउवायात प्रधानमन्त्री दयेकेत परमादेश जारी याःगु खः ।
LEAVE YOUR COMMENTS