मनपा १६ वडाया अध्यक्ष रिजालया अन्तिम संस्कार
येँ (नेपालभाषा टाइम्स)÷येँ महानगरपालिका वडा नं. १६ या वडा अध्यक्ष लिसें नेपाली कांग्रेस ७ नम्बर निर्वाचन क्षेत्रया सभापति मुकुन्द रिजाल मदुगु शोकय् कन्हय् थौं येँ महानगरपालिकाय् बिदा बिउगु दु । महानगरपालिकाया प्रशासन विभाग प्रमुख दिपक अधिकारीं कन्हय् शाेक बिदा बिउगु खँ धयादीगु दु ।
येँया धापासी ग्राण्डी अस्पतालय् वासः याकुयाकुं रिजाल थाैं सुथय् ७ बजे मदुगु खः । रिजालयात भाइरल निमोनिया जूगु खँ धाःगु दु । वय्कःयात वंगु भदौ १७ गते निगुलिं स्वँय् सिभियर निमोनिया जुयाः आइसीयुलय् तयाः वासः याकातःगु खः ।
रिजालया सीम्हयात थाैं हे पशुपति आर्यघाट अन्तिम संस्कार याःगु खः । अन्तिम संस्कार याये न्ह्यः वय्कःया सीम्ह अन्तिम श्रद्धाञ्जली बीत राष्ट्रियसभा गृहय् छुं ई तःगु खः । पशुपति आर्यघाटय् वय्कःया सीम्हय् येँ मनपाया मेयर बालेन साहं मनपाया ध्वाँय् फायेकादीगु खः । अन्तिम श्रद्धांजलि प्वंकेत येँ मनपाया उपमेयर सुनिता डंगोल, पुलांम्ह मेयर विद्यासुन्दर शाक्य, वडा अध्यक्षपिं लिसें आपालं मनूतय् उपस्थिति दुगु खः ।
थ्वहे झ्वलय् नेपाली कांग्रेसया सभापति शेरबहादुर देउवां रिजाल मदुुगुलिं दुःख प्वंकादीगु दु । सभापति देउवां म्हिगः छगू प्रेस विज्ञप्ति पित बिसें छेँजःयात बिचाः हायेकादीगु खः ।
पुलांम्ह मेयर विद्यासुन्दर शाक्यया पालय् येँ मनपाया स्कुलय् स्थानीय विषय नेपालभाषा ब्वंकेगु ज्या न्ह्याकूबलय् शिक्षा समितिया संयोजक कथं रिजालं ग्वाहालि यानादीगु खः ।
LEAVE YOUR COMMENTS