स्वयम्भूया शान्तिपू सर्वसाधारणया निंतिं चाल

येँ – स्वयम्भूया तान्त्रिक देगः शान्तिपू म्हिगः मंगलवाः निसें सर्वसाधारणया निंतिं चायेकूगु दु । वि.सं. २०७२ सालया तःभुखाचं पूवंक क्षति जूगु शान्तिपू पुनःनिर्माण क्वचायेवं मंगलवाःनिसें पुज्यायेगु निंतिं चायेकूगु खँ स्वयम्भू व्यवस्थापन तथा संरक्षण महासमितिया महासचिव महेन्द्ररत्न बुद्धाचार्यं कनादीगु दु ।

थ्व देगः पुरातत्व विभागया ग्वाहालिं महासमितिपाखें पुनःनिर्माण याःगु खः । शान्तिपू देगः दुनेया गुह्य थासय् दयेकेगु झिंन्हय्म्ह देखा दुपिं दँकःमितय्त दुने छ्वयाः पुनःनिर्माणया ज्या याःगु खः । थ्व देगः तान्त्रिक देगः जूगुलिं देखा मकाःपिं सुं हे दुहां वने मजिउगु जूगुलिं यलया झिंन्हय्म्ह देखा दुपिं दँकःमित मालाः ज्या याकागु खँ समितिया उपाध्यक्ष ज्ञानु लामां कनादीगु दु ।

तःभुखाचं शान्तिपू दुने क्वय् स्वतँजाः तक आपालं क्षति याःगु खः । पुनःनिर्माणया झ्वलय् शान्तिपूया क्वय् स्वतँजाः तक पूवंक हे भिंकेगु ज्या जूगु खः । थन दुने ३६ निसें ४८ इञ्च ब्या तकया अंग दुगुलिं ज्या यायेत यक्व ई काःगु खँ महासचिव बुद्धाचार्यं कनादिल ।

थन दुने च्वंगु कलात्मक सिँ हाकनं छ्यलागु खँ नं वय्कलं कनादिल । अथेहे शान्तिपू पिने छचाखेरं पारुद्यः धकाः थीथी ४२ म्ह द्यः नं स्यंगुलिं भिंकाः पुनः स्थापना यानागु खँ इन्जिनियर राजेश सुवालं कनादीगु दु ।