थनिंनिसें थेच्व नवदुर्गा द्यःया झिंनिदँया जात्रा
थेच्व (नेपालभाषा टाइम्स)÷थनया नवदुर्गा द्यःया झिंनिदँया जात्रा थनिंनिसें न्ह्याइगु जूगु दु । श्री नवदुर्गा भवानी देवी गुथिपाखें छगू सुचं जारी यासें थौं दिल्लागा त्रयोदशि (गथांमुगःचः¥हे)कुन्हुनिसें झिंनिदँया जात्रा (मेला) संचालन जुइगु जानकारी बिउगु खः ।
परम्परानिसें न्ह्याना वयाच्वंगु थनया जात्राया इलय् थेच्वय् च्वंपिंसं छु छु याये मजिउ धइगु नियमसहितया सुचं जारी याःगु खः। गुथिं जारी याःगु जात्रा सम्बन्धी सुचनय् इहि, कय्तापुजा, इहिपा लगायत छुं नं लसता भ्वय् याये मजिउगु, फल्चा, सतः वा मेगु गुगुं नं थासय् च्वने बलय् तुति यखायाः च्वने मजिउगु, पिनें वःपिं पाहांपिंत बासं च्वनेत थाय् बी मजिउ ।
जात्राज्वःछि बहनिसिया ९ ताः इलंनिसें सुथसिया ४ ताःई तक वये वने याये मजिउगु, सुलि पुइगु, सिट्टी पुइगु, छेँ व देगलय् च्वंगु गं थायेगु नापं लापा थायेगु याये मजिउगु, थनिंनिसें धुखः प्याखं क्वमचाःतले जात्राया इलय् गुथिपाखें थाइगु बाजं बाहेकं मेगु छुं नं बाजं थाये मजिउगु सुचनय् न्ह्यथनातःगु दु ।
अथे हे नवदुर्गा द्यःया पुजा जुइगु इलय् गुथि बाहेकया मेगु बाजं थाये जिउ व धुखः प्याखं क्वचायेवं झिंनिदँया जात्रा नं क्वचाइगु व गथांमुगःकुन्हु निसें बन्द यानातःगु सकतां बाजं व बन्द यानातःगु नियमत नं फुकुवा जुइगु सुचनय् धयातःगु दु ।
वइगु फागुनतक न्ह्याइगु थनया जात्राया इलय् जात्राज्वःछि २८ ताजिकथंया थीथी पुजा जुइगु व जात्राया निंतिं गोदावरी नगरपालिकां २८ गू लख तका दां विनियोजन याःगु दु । करिब च्यालातक न्ह्याइगु जात्राय् ७० लाख स्वयां अप्वः खर्च जुइगु अनुमान गुथिं यानातःगु दु ।
LEAVE YOUR COMMENTS