कथिनदानलिसें बुद्ध मूर्ति उलेज्या

यल – थनया प्रयोग पुखूस्थित श्री अष्ट सद्धर्मायतन विहारय् निक्वःखुसी कथिनोत्सव ज्याझ्वः जुल । विहारय् श्रद्धेय भिक्षु पञ्ञासार व भिक्षु वौवरं वर्षावास पूवंका बिज्याःगु लसताय् उगु कथिनोत्सव ज्याझ्वः जूगु खः ।

ज्याझ्वलय् भिक्षु महासंघया महासचिव भिक्षु कोण्डन्य महास्थविरं कथिन दान बारे धर्मदेशना बियाबिज्याःगु खः । धर्मदेशना लिपा विहारया ज्येष्ठ भिक्षु धम्मसोभन महास्थविरयात कथिनोत्सवया दातापिं कमलालक्ष्मी खड्गी, दयालक्ष्मी खड्गी, कुललक्ष्मी खड्गी, राजभाई प्रकाश लगायतं अष्टपरिष्कार (कथिन चीवर) दान यानादीगु खः ।

उगु इलय् उपासक उपासिकापिंसं नं भिक्षु संघयात अष्टपरिष्कारलिसें श्रद्धा दान यानादीगु खः । ज्याझ्वलय् नेपाःस्थित श्रीलंका द्ूतावासपाखें विहारया निंतिं प्राप्त समाधि बुद्धया मूर्ति व बुद्ध प्रतिमा समाजसेवी मोतिलाल शिल्पकारं प्रतिस्थापन यानाः उलेज्या यानादीगु खः ।

उगु इलय् नेपाःया निंतिं श्रीलंकाया राजदूत हिमाली सुभाषिनि अरुणातिलकां नेपाःया थेरवाद बद्धुशासनया विकासय् योगदान याये खंगुलिं लय्ताःगु खँ कनादिल । लिसें विहारयात लःल्हाःगु श्रीलंकाया अनुराधापुरया बुद्ध मूर्तिया सक्कल मूर्ति स्वयेत श्रीलंकाया भ्रमण यायेत नं इनाप यानादिल ।

यल महानगरपालिकाया प्रमुख चिरिबाबु महर्जनं युएनडीपीपाखें स्वांयाःपुन्हिया लसताय् ग्वसाः ग्वःगु ज्याझ्वलय् ब्वति कयागु इलय् बियागु बचं कथं यल महानगर परिसरय् ल्वहंया बुद्ध मूर्ति स्थापना यानागु खँ कनादिल ।

भिक्षु भद्दिय महास्थविर, समाजसेवी शिल्पकारं नं नुगःखँ तयादीगु ज्याझ्वलय् विहारया दाता दयालक्ष्मी खड्गीं सुभाय् देछानादीगु खः ।