
येँ – जिल्ला प्रशासन ज्याकू, येँय् नं सुरक्षायात ध्यानय् तयाः येँ दुनेया थीथी खुगू थाय्यात निषेधित क्षेत्र क्वःछिउगु दु । येँ जिप्रका ज्याकुथिं राष्ट्रप्रमुख व सरकार प्रमुखया निवास, देय्या प्रमुख प्रशासनिक केन्द्र सिंहदरवार व उकिया जःखःया लागा यानाः खुगू थाय्यात निषेधित क्षेत्र क्वःछिउगु खः ।
जिप्रकां राष्ट्रपतिया निवास दुगु शीतलनिवास व उकिया जःखःया क्षेत्र, प्रधानमन्त्रीया सरकारी निवास बालुवाटार, संघीय संसद भवन दुगु न्हू बानेश्वर, प्रमुख प्रशासनिक केन्द्र सिंहदरवार, उपराष्ट्रपतिया निवास सामाखुसीं कपुरधारा वनेगु लँया मोड, उपराष्ट्रपतिया ज्याकू नापं निर्वाचन आयोगया ज्याकू दुगु जमःस्थित कान्तिपथ व उकिया जःखःया लागायात निषेधित क्षेत्र घोषणा याःगु खः ।
जिप्रकां निषेधित क्षेत्र घोषणा यानातःगु उगु थासय् विना पूर्व सूचना छुं नं गतिविधि, प्रदर्शन वा ज्याझ्वः यात धाःसा कानुनकथं कारवाही जुइगु न्ह्यथंगु दु । जिल्ला सुरक्षा समिति, येँया सिफारिसय् व स्थानीय प्रशासन ऐन–२०२८या दफा ६ या (३) कथं मेगु आदेश जारी मजूतलेया निंतिं येँ जिल्लाया प्रमुख जिल्ला अधिकारी केदारनाथ शर्मापाखें जुलुस, प्रदर्शन, धर्ना, घेराउ थेंज्याःगु आन्दोलन व विरोधया ज्याझ्वः मयायेत व मयाकेत निषेधाज्ञा जारी यायेगु आदेश जूगु जिप्रकां जारी याःगु सुचनाय् न्ह्यथनातःगु दु ।
LEAVE YOUR COMMENTS