मनपाया स्कूलय् नेपालभाषा

स्थानीय विषयया सफू स्थानीय भाषां हे ब्वंकेत सहमति

येँ – येँ महानगरपालिकाया शिक्षा विभागं महानगर दुनेया शिक्षण संस्थाय् नेपालभाषाया हे माध्यमं स्थानीय विषय ब्वंकीगु सम्भावना अप्वःगु खँ सीदुगु दु ।

स्थानीय विषय नेपालभाषा लगायत खस नेपाली व अंग्रेजी भासं नं ब्वंकेगु लागिं धकाः मनपाया शिक्षा विभागं निगू अलग अलग हे समिति गठन याःगु खः । तर म्हिगः च्वंगु थ्व निगुलिं समितिया मंकाः बैठकय् नेपालभाषा आन्दोलनया अभियन्ता समेत जुयाच्वंपिं समितिया दुजःतय्सं स्थानीय विषय नेपालभाषाया हे माध्यमं ब्वंकूसा बांलाइ, खस नेपाली व अंग्रेजी भासं ब्वंकेगु आवश्यक मदु धइगु तर्क तयेवं बैठक नेपालभाषाया माध्यमं ब्वंकेगु दिशापाखे सकारात्मक जुया वंगु खँ समितिया दुजः डा. चुन्दा वज्राचार्यं कनादीगु दु ।

स्वनिगः व नेवाःतय्गु बार च्वयातःगु ‘स्थानीय विषय’ या पाठ्यसफू शुरुइ नेपालभाषां च्वयाः लिपा उकियात खस नेपाली व अंग्रेजी भासं नं अनुवाद यायेगु धकाः नेपालभाषाया लागिं छगू व खस नेपाली लगायत अंग्रेजी भाय्या लागिं छगू धकाः निगू अलग अलग समिति गठन याःगु खः । तर आः थ्व विषय नेपालभाषां जक ब्वंकूसां गाः धइगु खँ पिहां वःगुलिं खस नेपाली व अंग्रेजी भाय्या लागिं धकाः दयेकूगु समिति हे भंग याना छ्वइगु सम्भावना दुगु खँ नं डा. वज्राचार्यं ‘नेपालभाषा टाइम्स’यात कनादिल ।

ख्वप नगरपालिकां दयेकूगु पाठ्यसफू विषय नेवाःतय्गु बारे खःसां भाषा धाःसा खस नेपाली जुयाच्वंगु खःसा येँय् नं अथे हे यायेगु प्रस्ताव बैठकय् वःगु खः । तर समितिया दुजःतय्सं थौंकन्हय् २५ गू सरकारी स्कूल व रातो बंगला, जेम्स थेंज्याःगु स्कूलय् नं नेपालभाषाया हे पाठ्यसफू ब्वंकाच्वंगु दु धइगु तर्क तयेवं बैठकया अध्यक्षता यानाच्वनादीम्ह संयोजक निर्मला केसीं नेपालभाषां हे जक ब्वंकीगु पाठ्यसफू तयार यायेगु खँय् सहमति क्यनादीगु खः । तर थुकी बैठक सकारात्मक जूसां निर्णय धाःसा जूगु मदुनि । येँ मनपाया मेयर व शिक्षा विभागया समेत राय कयाः उकथंया निर्णय यायेगु सहमति जूगु खँ नं डा. वज्राचार्यं कनादीगु दु । समितिया बैठकय् डा. वज्राचार्य लिसें नरेशवीर शाक्य, वरुण प्रसाद वैद्य आदिपिं नं दुगु खः ।

नेपालभाषाया माध्यमं ब्वंकीगु थ्व सफू आःयात प्राथमिक तगिं कथं कक्षा १ निसें ८ तक ब्वंकी । वयां लिपा उच्चशिक्षा तगिं कथं ९ निसें १२ तकया लागिं नं पाठ्यक्रम तयार याइ । मनपाया थुगु समितिपाखें पाठ्यक्रम तयार यायेधुनेवं पाठ्यसफू च्वयेगु ज्या न्ह्याइगु खँ धाःगु दु। नेवाः अभियन्तातय्सं ताःई न्ह्यवंनिसें हे शिक्षाय् थज्याःगु व्यवस्थाया माग याना वयाच्वंगु खः ।

सम्बन्धित बुखँ

LEAVE YOUR COMMENTS