सम्पदा पुनर्निर्माणय् स्थानीय हे सक्षम जू धयागु मरुसतः पुनर्निर्माणं प्रमाणित जूगु दु – मुख्यमन्त्री शाक्य

येँ – बागमती प्रदेशया मुख्यमन्त्री अष्टलक्ष्मी शाक्यं देय्या सम्पदा पुनर्निर्माणया ज्या स्थानीय शीप, प्रविधि व स्थानीय ध्यबां हे यायेफुगु धयागु खँ मरुसतः पुनर्निर्माणं प्रमाणित जूगु खँ धयादीगु दु । वय्कलं बुधवाः मरुसतःपुनर्निर्माण अवलोकन यानादिसें थ्व खँ धयादीगु खः ।

मरुसतः पुननिर्माण अवलोकन यानादीधुंकाः वय्कलं धयादिल, ‘झीसं झीगु सम्पदा पुनर्निर्माणया निंतिं नं विदेशी ग्वाहालि वइ, विदेशी दाता वइ, उमिसं पुनर्निर्माण याइ धकाः आशा यानाच्वना, तर झीगु सम्पदा दयेकेगु निंतिं झी हे सक्षम जू, झीगु प्रविधि हे उत्कृष्ट जू धयागु मरुसतःया पुनर्निर्माणं प्रमाणित यानाबिउगु दु ।’

वय्कःयात बुधवाः सुथय् मरुसतलय् लसकुस यासें काष्ठमपण्डप पुनर्निर्माण समितिया अध्यक्ष व बागमती प्रदेशया सांसद राजेश शाक्यं मरुसतः पुनर्निर्माणया बारे जानकारी बिउगु खः । थ्व झ्वलय् अध्यक्ष शाक्यं येँ महानगरपालिकाया आर्थिक ग्वाहालिं पूवंक स्थानीय प्रविधि, स्थानीय जनशक्ति छ्यलाः मरुसतः पुनर्निर्माण जूगु खँ कनादीगु खः ।

थ्व झ्वलय् वय्कलं मरुसतः पुनर्निर्माणया ज्या मुक्कं खुता वस्तु जक छ्यला जूगु जानकारी बियादीगु खः । पुनर्निर्माणया ज्याय् चा, सिँ, ली, न, सिजः व ल्वहं जक छ्यःगु खः । मरूसतः दयेकेगु निंतिं सिमेन्ट, डण्डी थेंज्याःगु छुं नं अाधुनिक निर्माण सामग्री छ्यःगु मदु । अथेहे ततःग्वःगु थां धंकेगु निंतिं, निनाः तयेगु निंतिं नं छुं हे कथंया मेसिनया छ्यलाबुला मयासे स्थानीय प्रविधि हे छ्यलाः थनागु जानकारी नं वय्कलं बियादीगु खः ।

वय्कलं मरुसतःपुनर्निर्माणया ज्या क्वःछिनातःगु ई दुने हे क्वचायेकेगु कथं ज्या न्ह्यानाच्वंगु व आःतक ९५ प्रतिशतं अप्वः ज्या सिधयेधुंकूगु खँ नं धयादीगु दु ।

 

सम्बन्धित बुखँ

LEAVE YOUR COMMENTS