थाय्मरुइ च्वंगु वास्याःद्यः खुया यंकल

नेपालभाषा टाइम्स
???? ?????? त्रयोदशी
- बुखँ
- स्वनिगः
किपा-किपा साभार - संजय महर्जनया फेसबुक

येँ-थनया थाय्मरु त्वालय् च्वंगु नांजाःगु वास्याःद्यः खुया यंकूगु दु । खुया यंकूम्ह मनूयात द्यः नापं ज्वंगु दुसां वयागु मानसिक अवस्था स्यंम्ह धासें प्रहरीं त्वःतेगु तयारी याःगुलिं स्थानीय मनूतय्सं जनसेवा प्रहरी चौकीयात सचेत याःगु खँ सीदुगु दु । वा स्यइबलय् थ्व द्यःयाथाय् नकिं ताल कि वा स्याःगु लनी धइगु विश्वास यानातःगु दु । उकिं थ्व द्यःयाथाय् ध्यबा छगः तयाः नकिं तायेगु चलन दु । थ्व द्यः धयाम्ह मुलतः सिँयागु छगू ग्वः खः । उकी हे ध्यबाया ध्याक तयाः नकिं ताइगु खः ।

थ्व द्यः खुया यंकेगु कुतः वंगु शुक्रवाः चान्हय् जूगु खः । द्यः खुइगु लागिं म्हुयाच्वंगु इलय् स्थानीय मनूतय्सं खंकाः वयात ज्वंगु खःसा ज्वनाः प्रहरीयात लःल्हाना बिउगु खः । तर प्रहरीं ज्वनाः कुनातःबलय् चान्हय् तसकं हालाः दुःख बिल धकाः वयात चान्हय् हे त्वःता छ्वत ।

त्वःता छ्वयेधुंकाः शनिवाः बहनी हानं गल हे ज्वना वयाः म्हुया कासें द्यःया छकू टुक्रा खुया यंकूगु खः । द्यःया टुक्रा ज्वनाः लँय् वयाच्वंम्ह वयात हानं मेपिं मनूतय्सं खंकाः प्रहरीइ तुं बुझे याना बिउगु खः । तर प्रहरीं धाःसा थ्व मनू मानसिक अवस्था ठीक मजूम्ह धासें त्वःतेगु तयारी यानाच्वंगु खँ सीवं म्हिगः न्हिनय् स्थानीय मनूत हे जनसेवा प्रहरीइ वनाः धर्ना बिउगु खः ।

मानसिक सन्तुलन मदुम्ह धाःसां गल लगायत थीथी ज्याभः हे ज्वनाः वहे द्यः तःक्वः तःक्वःमछि खुइगु कुतः याःगुलिं वं मानसिक सन्तुलन स्यंगु नाटक जक यानाच्वंगु जुइमाः धकाः आशंका जूगु दु ।

थाय्मरु त्वालय् थ्व द्यः गबले स्थापना जुल धइगु स्पष्ट इतिहास मदु । थाय्मरु त्वाःया इतिहास मरुसतः ति हे पुलां धइगु अनुमान दुसा वास्याःद्यःया रूपय् पुजा याना वयाच्वंगु थ्व सिँग्वः नं उलि हे पुलां जुइमाः धइगु अनुमान दु । उकिं नं थुकी द्यःखुँतय्गु मिखा वनाच्वंगु आशंका दु ।