थिमिइ वडाव्यापी लिग फुटबल
थिमि(नेपालभाषा टाइम्स)- मध्यपुरथिमि नगरपालिकाया ग्वसालय् वडाव्यापी लिग फुटबल कासा शुरु जूगु दु । मध्यपुरथिमि नगरपालिकाया ग्वसालय् लछिया ‘ मध्यपुरथिमि वडाव्यापी लिग फुटबल कासा’ शुरु जूगु खः ।
मध्यपुर युथ एशोसियसनया संयोजनय् वंगु असोज ८ गतेनिसें शुरु जूगु कासा कात्तिक ७ गतेतक न्ह्याइ ।
मध्यपुरथिमि नगरपालिकाया प्रमुख सुरेन्द्र श्रेष्ठं राष्टिय व अन्तर्राष्ट्रिय स्तरया कासामि उत्पादन यायेगु उद्देश्यं दँय्दसं थुकथंया वडाव्यापी लिग फुटबल कासा संचालन यायेगु जानकारी बियादिल ।
थुकथंया कासा ग्वसाः ग्वयाः मध्यपुरथिमियात कासाया ‘हब’या रुपय् विकास यायेगु उपप्रमुख विजय श्रेष्ठं कनादिल ।
मध्यपुरथिमि नगरपालिकाया वासिन्दां जक ब्वति काये दइगु व प्रत्येक वडापाखें छगू छगू पुचलं ब्वति काये दइगु कासा राउण्ड रोविन लिगकथं जुइ ।
कासाया संयोजकलिसें एशोसियसनया उपाध्यक्ष अष्टकुमार कवां प्रत्येक टीमं च्यागू कासा म्हितेमाःगु व मुक्कं ३६ गू कासा जुइगु जानकारी बियादिल ।
एशोसियसन अध्यक्षलिसें पुलांम्ह राष्ट्रिय फुटबल टीमया गोलरक्षक नापं कप्तान उपेन्द्रमान सिंहं विजेतायात ट्रफीलिसें निगू लख न्यय्द्वः, लिउयात छगू लख नीन्याद्वः व लियांलिउयात ख्वीद्वः तका दांलिसें अनुशासित टिमयात फेयर प्ले अवार्डकथं नीन्याद्वः तका बीगु जानकारी बियादिल ।
अथे हे कासाय् उत्कृष्ट कासायात नीद्वःलिसें उत्कृष्ट गोलरक्षक, मिडफिल्डर, रक्षक, स्ट्राइकरयात झिद्वः, झिद्वः तकालिसें प्रत्येक कासाय् म्यान अफ द म्याचयात ट्रफीया व्यवस्था यानातःगु दु ।
LEAVE YOUR COMMENTS