नेपालभाषा टाइम्स अमेरिकाय् खँल्हाबल्हाया डबल माइलस्टोन ज्याझ्वः

येँ(नेपालभाषा टाइम्स)÷ नेपालभाषा टाइम्स अमेरिकाया नेवाः खँल्हाबल्हा ज्याझ्वः ‘अमेरिकाय् नेवाः’ १५० गू ब्व व नेपालभाषा टाइम्सया समय सान्दर्भिक ज्याझ्वः ‘छिनाप झिंन्यागू मिनेटया छझाः’ ७५ गू ब्व थ्यंगु लसताय् वंगु अगस्टया न्हापांगु वालय् छगू विशेष ज्याझ्वः जुल । थुपिं निगुलिं बिस्कं ज्याझ्वःया ‘डबल माइलस्टोन’ पूवंगु लसताय् उगु ज्याझ्वः अमेरिकाया भर्जिनियाया तन्दुरी नाइट रेष्टुरेण्ट एण्ड बारय् जूगु खः ।

फेसबुकया माध्यमं न्ह्याका वयाच्वंगु ‘अमेरिकाय् नेवाः’ व ‘छिनाप झिंन्यागू मिनेटया छझाः’ज्याझ्वः न्ह्याकामि प्रविण ताम्राकारं लसकुस यानादीगु ज्याझ्वः प्यघौलं मल्याक न्ह्याःगु खः । अमेरिकाय् च्वंपिं नेवाःतय् थीथी खलः, पुचः संघसंस्थाया नायः, पदाधिकारी व प्रतिनिधिलिसें अमेरिकाया थीथी राज्य व सहर कोलोराडो, मिचिगन, शिकागो सहरपाखें नं प्रतिनिधित्व यासे ज्याझ्वलय् ब्वति काःगु खः । अथे हे नेपालं अमेरिका चाःहिलेत वनाच्वंपिं आपालं नेपाःमिपिंसं नं उगु ज्याझ्वलय् ब्वति काःगु खः ।

‘नेपालभाषा टाइम्स’ न्हिपौया बःचाहाकःगु वृत्तचित्र न्ह्यब्वसे न्ह्याःगु ज्याझ्वलय् निगुलिं ज्याझ्वलं ‘डबल कोश ल्वहं’ पार याःगु लसताय् नेवाः न्ह्यलुवापिंसं बियादीगु न्हय्गू भिंतुना सन्देशया भिडियो नं क्यनेज्या जूगु खः । उगु भिडियो सन्देश नेवाः सूचना केन्द्रया ग्वाहालिं तयार याःगु खः । ज्याझ्वलय् नांजाःम्ह म्येँ हालामि संजीप प्रधानलिसें मेपिं आपालं कलाकारं थःथःगु सांगीतिक, हुलाप्याखं व सांस्कृतिक प्रस्तुति न्ह्यब्वयादीगु खः । सत्या स्वयां अप्वःसिनं ब्वति काःगु ज्याझ्वःया निर्देशन व संयोजन राजीव श्रेष्ठं यानादीगु खः ।

ज्याझ्वलय् लिजा प्रधान चौधरीया लिजा ब्यूटी एण्ड फेशन हबपाखें फेशन शो नं न्ह्यब्वःगु ज्याझ्वःयात आपालं संघसंस्थापाखें ग्वाहालि व प्रायोजन याःगु खः । उकीमध्ये क्यानाडाय् च्वंपिं नेवाःतय् संस्था क्यानेडियन नेवाः गुथिपाखें जक न्यागू भिडियोया प्रायोजनलिसें आर्थिक ग्वाहालि याःगु खःसा एअरजोन ट्राभल्सलिसें थीथी सामाजिक व व्यावसायिक संस्थां नं आर्थिक ग्वाहालि याःगु खः । अथे हे टेक्सास, ओरेगनलिसें व्यक्तिगत रुपं नं ज्याझ्वः ताःलाकेत ग्वाहालि याःगु ज्याझ्वःयात ईनेप्लिज डटकमं प्रत्यक्ष प्रशारण याःगु खः ।

थुकथं हे ज्याझ्वलय् नांजाःम्ह कवि वसन्त श्रेष्ठं नेवाः अर्गनाइजेसन अफ अमेरिका (एनओए)या निंतिं जनकवि दुर्गालाल श्रेष्ठया ‘गिजिमिजि ध्वः’ सफू प्रमोशन यानदाीगु खःसा नेपाल फिलाटेलिक ब्यूरोया पुलांम्ह नायःपाखें नेपाः पासा पुचः अमेरिकाय् (एनपीपीएं)या नायःयात सफू उपहार लःल्हानादीगु खः ।

उगु इलय् एनपीपीएया पुलांम्ह नायः राज जोशी, नांजाःम्ह म्येँ हालामि संजीप प्रधानलिसे उपस्थित सकसिगुं न्ह्यःने प्रत्यक्ष रुपं खँल्हाबल्हा ज्याझ्वः नं याःगु खः । एलिन प्रधानं तसकं न्ह्यइपुसे च्वंक न्ह्याकादीगु ज्याझ्वलय् सःशुल्क टिकटया व्यवस्था यानातःगु खः । थीथीकथं ग्वाहालि यानादीपिं आवश्यकताकथं फ्रि टिकटया नं व्यवस्था याःगु खः ।