स्वनिगलय् ८१ प्रतिशतयात खोप

येँ – नेपालय् कोरोना भाइरस विरुद्धया खोप बीगु ज्या लक्ष्य कथं हे न्ह्याः वनाच्वंगु खँ सीदुगु दु । थ्वहे असोज मसान्त तकया दुने कुल जनसंख्याया ३३ प्रतिशत जनसंख्यायात खोप बीकेगु लक्ष्य नेपाः सरकारं तयातःगु दुसा आः तकया ल्याः कथं उगु लक्ष्य पूवंगु खँ धाःगु दु ।
नेपाः न्यंकं कोरोनाया विरुद्धया खोप बीगु झ्वलय् स्वनिगलय् धाःसा न्हापांगु मात्राया खोप काःपिनि ल्याः ८१ प्रतिशत थ्यंगु दुसा निगूगु मात्राया खोप काःपिनि ल्याः ७४ प्रतिशत थ्यंगु दु ।

स्वास्थ्य मन्त्रालयया सहप्रवक्ता डा. समिरकुमार अधिकारीया कथं स्वनिगः दुने १७ लाख ४५ द्वः ५७० म्ह व पूर्णमात्रा १७ लाख ७९ द्वः ८९७ म्हेसित खोप बीधुंकूगु दु । स्वनिगलय् १८ दँ स्वयां च्वय्यापिं मनूत २१ लाख २९ द्वः ७७३ म्ह दु ।

सामान्यतया छुं नं थाय्या ५० प्रतिशत स्वयां अप्वः मनुखं खोप काल धाःसा उगु लागायात कोरोनापाखें सुरक्षित जूगु माने याइगु चलन दु ।
अथे हे देय्न्यंकं न्हापांगु मात्राया खोप काःपिं ४० प्रतिशत थ्यंगु दुसा पूर्णमात्राया खोप काःपिं ३२ प्रतिशत थ्यनेधुंकूगु दु । मन्त्रालयं धाः कथं न्हापांगु मात्राया खोप काःपिं ८७ लाख २ द्वः ७०५ म्ह व पूर्णमात्राया खोप काःपिं मनूतय् ल्याः ६९ लाख ६२ द्वः १६४ म्ह थ्यंगु दु ।

सरकारं १८ दँ स्वयां च्वय्यापिं २ करोड १७ लाख ५६ द्वः ७६३ म्हेसित खोप बीगु ताः तयातःगु दु । थ्वहे झ्वलय् म्हिगः देय्न्यंकं यानाः ७६४ म्ह न्हूपिं कारोना विरामी थपे जूगु दु ।

सम्बन्धित बुखँ

LEAVE YOUR COMMENTS