कोतः धुकूयात राज्यं क्षतिपूर्ति बीमाःगु माग

येँ (नेपालभाषा टाइम्स)÷थनया बालाजुइ च्वंगु पुलांगु पेट्रोल पम्प कोतः धुकूयात येँ मनपां बल छ्यलाः सिल याःगु खँयात कयाः विरोध शुरु जूगु दु । व्यापार व्यवसाय यानाः नयेगु नागरिकया मानव अधिकार जूगु कारणं यदि कोतः धुकू बन्द यायेगु खःसा उकिया थुवाःयात राज्यपाखें क्षतिपूर्ति बीमाःगु माग याना हःग दु ।

उगु पेट्रोल पम्प चीकेगु लागिं न्हापा नं कुतः जूगु खःसा उकिया विरुद्ध कोतः धुकू अदालत वंगु खः । अदालतं कोतः धुकूया पक्षय् फैसला याना तःगु खःसां म्हीग महानगरपालिकाया नगर प्रहरीं गुण्डागर्दी शैलीं अन सिल तयेगु ज्या याःगु खः । उकिया प्रतिकार याःपिं निम्ह मनूयात ज्वना नं यंकूगु दु ।

महानगरपालिकाया थ्व ज्यायात कानुन व्यवसायीतय्सं नं विरोध याना हःगु दु । अधिवक्ता जितेन्द्र वज्राचार्यं सार्वजनिक रुपं हे थःगु धापू पित बिसें मनपाया थ्व ज्यां अदालतया फैसलायात भ्वंया थू जक खः धकाः पुष्टि यायेत स्वःगु खँ धयादीगु दु ।

लुमंकेबहः जू, उगु थासय् सडक विस्तार याःगु इलय् कोतः धुकूया जग्गा नं राज्यं अतिक्रमण यानाः काःगु खः । पेट्रोल पम्प तयातःगु कम्पाउण्ड राज्यं अतिक्रमण यानाः कायेधुंकाः थःगु छेँय् जूसां पेट्रोल व्यवसाय चले यानाच्वंगु खः । तर छेँय् पेट्रोल पम्प तःगु मिले मजुल धासें मनपां अन सिल याना बिउगु खः ।

थुकिं यानाः नागरिकया व्यवसाय यानाः नयेगु अधिकारया हनन् जूगु खँ नं अधिवक्ता वज्राचार्यं धयादीगु दु । सडक विस्तारया नामय् राज्यं नागरिकया जग्गा जक मखु जीविकोपार्जनया साधन तकं हड्पे याःगुलिं थ्व अलोकतान्त्रिक व तानाशाही जूगु खँ धाःगु दु । पेट्रोल पम्प बन्द यायेबलय् थुकिं सम्बद्ध थुवाःया व्यवसाय व रोजगारी समेत हनन् जुइगु जूगुलिं राज्यं दकलय् न्हापां वयात माःगु क्षतिपूर्ति निं बीमाःगु माग याना हःगु दु । थ्व मामिलाय् क्षतिपूर्तिया माग यासें मनपाय् सः तः वनेगु तयारी जुयाच्वंगु खँ सीदुगु दु ।