स्थानीय तहय् एकीकृत समाजवादी कमजोर
येँ – एमालेयात कुचा यानाः दयेकूगु नेकपा एकीकृत समाजवादी स्थानीय तहया संगठन कमजोर खनेदुगु दु । नेता माधव नेपालं एमालेया १९ प्रतिशत संघीय सांसदत ज्वनाः पार्टी कुचा थःगु खः । एमालेपाखें १९ प्रतिशत सांसद ज्वना वःसां स्थानीय तहय् धाःसा नेपालया पार्टीइ वंपिं म्हो जक खनेदुगु खः ।
निर्वाचन आयोगं सोमवाः पितबिउगु तथ्यांक कथं स्थानीय तहय् निर्वाचित एमालेया जनप्रतिनिधि मध्ये थ्यंमथ्यं १०प्रतिशतं जक नेपालया पार्टी एकीकृत समाजवादीयात ल्यःगु दु । प्रदेशपाखे धाःसा तःम्ह हे सांसदत एकीकृत समाजवादीइ वंगु दु । आयोगया तथ्यांक कथं एमालेया २३३ म्ह प्रदेश सांसदत मध्ये २३ प्रतिशत अर्थात ५४ म्ह सांसदत एकीकृत समाजवादीइ दुहां वंगु दु ।
स्थानीय तहय् धाःसा एमालें त्यानावंपिं १४ हजार ७०० म्ह सांसद मध्ये मुक्कं १५०१ म्ह सांसदं जक एकीकृत समाजवादीयात ल्यःगु दु । थुपिं मध्ये गुलि प्रमुख, उपप्रमुख व अध्यक्ष दुथ्याः धयागु धाःसा सीमदुनि । संघीय संसदपाखें मुक्कं १५४ म्ह एमाले सांसद मध्ये २९ म्ह एकीकृत समाजवादीइ वंगु खः।
एमालें कुचाः जुयाः एकीकृत समाजवादी पार्टी दयेकूबलय् निर्वाचन आयोगं जनप्रतिनिधितय्त पार्टी ल्ययेगु निंतिं २१ न्हुया ई बिउगु खः । थ्व २१ न्हुया दुने एकीकृत समाजवादीइ आवद्ध जूपिं जनप्रतिनिधितय्गु तथ्यांक सोमवाः आयोगं पिकाःगु खः ।
प्रदेश पाखे सदूर पश्चिम व प्रदेश नं. २ लय् एकीकृत समाजवादी एमाले स्वयां नं तःधंगु पार्टी जूगु दु । सदूर पश्चिमय् एमालेया मुक्कं १४ म्ह सांसद मध्ये १३ म्ह समाजवादीइ वःगु खः । उकिं थन नेपालया समाजवादी पार्टी हे दकलय् तःधंगु पार्टी जूगु दुसा प्रदेश २ लय् २१ म्ह एमाले सांसद मध्ये १३ म्हेसिनं समाजवादी ल्यःगुलिं थन समाजवादी एमालेस्वयां तःधंगु पार्टी जूगु दु ।
LEAVE YOUR COMMENTS