चुनावी सरकारपाखें जूगु नियुक्ती जिउ कि मजिउ ?

येँ- वंगु शुक्रवाः सरकारं प्रदेश २ प्रमुख तिलक परियारयात चीकाः पत्रकार राजेश झायात प्रदेश प्रमुख नियुक्त याःगु दु । प्रधानमन्त्री केपी ओलीं आकाझाकां याःगु सिफारिसय् राष्ट्रपति विद्या भण्डारीं तुरुन्त हे स्वीकार यासें परियारयात चीकूगु खः ।

सरकारं चुनाव घोषणा याना तयेधुंकूगु अवस्थाय् परियारयात चीकूगु खँय् विवाद नं ब्वलनाच्वंगु दु । नेपाली कांग्रेसं छगू वक्तव्य हे बियाः चुनाव घोषणा यायेधुंकूगु अवस्था कामचलाउ सरकार सरकारं थथे नियुक्ती, बर्खास्त याये दइ मखु धासें विरोध याःगु दु ।

चुनाव घोषणा यायेधुंकाः ओलीं थःगु मन्त्रिमण्डल तकं पुनर्गठन, संवैधानिक निकायय् पदाधिकारीत नियुक्ती यायेगु लिसें सचिवत सरुवा याःगु दु । सरकारया थ्व ज्यायात कयाः उबलय् नं विरोध जूगु खः । कामचलाउ सरकारं याःगु थ्व ज्यायात कयाः विज्ञतय् दथुइ नं जिउ कि मजिउ धयागु खँय् विरोधाभाष खँ वयाच्वंगु दु ।

छथ्वः विज्ञतय्सं सरकारं चुनाव घोषणा याःसां निर्वाचन जु हे जुइ धयागु स्थिति मवःनिगुलिं सरकारं थथे नियुक्ती सरुवा यायेफु धयाच्वंगु दुसा छथ्वःसिनं निर्वाचन मिति घोषणा यायेधुंकाः १२० न्हुया आचार संहिता लागू जुइगु जूगुलिं चुनावयात प्रभावित जुइकथं सरकारं याःगु थ्व ज्या तःधंगु गल्ती खः धाःगु दु ।

प्रधानमन्त्री केपी ओलीं संसद विघटन यानाः वैशाख २३ गते चुनावया घोषणा याःगु खः । थ्व ल्याखं आः चुनाव यायेत मुक्कं निला जक ल्यं दनि । तर संसद विघटनया मुद्दा सर्वोच्चय् विचाराधीन जुयाच्वंगु लिसें ओली पक्ष व प्रचण्ड–नेपाल पक्षया नेकपाया आधिकारिकता बारे निर्वाचन आयोगं अझं निर्णय बियामच्वंगु अवस्थाय् घोषणा यानातःगु इलय् चुनाव जुइ कि मजुइ धयागु अन्यौलता दनि । थज्याःगु अवस्था दुगुलिं प्रधानमन्त्री सरुवा, नियुक्ती यायेगु ज्याय् लगे जूगु खँ पुलांम्ह प्रमुख निर्वाचन आयुक्त निलकण्ठ उप्रेतीया बिचाः दु । वय्कलं धयादी,

‘निर्वाचन जुइ धयागु अवस्था हे खनेमदुनि । निर्वाचन आचासंहिता नं लागू मजूनि, अथे जूगुलिं प्रधानमन्त्री थज्याःगु ज्या यायेत न्ह्यज्याःगु जुइमाः ।’ तर सरकारया पुलांम्ह प्रशासक पुलांम्ह मुख्यसचिव विमल कोइराला धाःसा सामान्यतः चुनाव घोषणा याःगु सरकारं सरुवा, नियुक्ती थेंज्याःगु ज्या यानाः चुनावयात लिच्वः लाकेगु ज्या यायेगु नैतिक रुपं मिले हे मजूगु खँ धयादीगु दु । वय्कलं धयादी, ‘थज्याःगु ज्या अप्वः थें स्वार्थसिद्ध यायेत हे जुइ, लोकतान्त्रिक देशय् थज्याःगु ज्यायात स्वीकार याये फइमखु ।’

वय्कःया लिसें मेमेपिं पुलांपिं प्रशासकत नं आचारसंहिता लागू मजूनि धयागु त्वह तयाः चुनावी माहौलय् दुहां वनेधुंकूगु सरकारं नियुक्ती वा सरुवा थेंज्याःगु ज्या याये मजिउगु पक्षय् दु । पुलांम्ह सचिव श्रीकान्त रेग्मीं धयादी, ‘आचारसंहिताया खास अर्थ धयागु चुनावय् खटे जुइपिं कर्मचारीत सरकारप्रति प्रतिबद्ध मजुसे निर्वाचन आयोगया स्वतन्त्र, निष्पक्ष, भयरहित, पारदर्शी रुपं चुनाव याकेगु धयागु प्रतिबद्धता प्वंकेगु निंतिं खः । तर आःया सरकारं सरुवा, नियुक्ती थेंज्याःगु ज्या यानाः निर्वाचन आयोगयात तकं प्रभावित यायेत स्वःगु खनेदु ।’

सम्बन्धित बुखँ

LEAVE YOUR COMMENTS