च्याम्पियन्स लिग- म्यानचेस्टर युनाइटेड, बार्यन व युभेन्टेस त्यात, बार्सिलोना बुत

एजेन्सी- च्याम्पियन्स लिगया बुधवाः चान्हय् जूगु कासाय् समूह ‘एफ’ य् च्वंगु म्यानचेस्टर युनाइटेडं भिल्लारियलयात बुकूगु दु । कासाय् छगू गोलं लिउने लानाच्वंगु म्यानचेस्टर युनाइटेडं भिल्लारियलयात २–१ गोलं बुकूगु खः । कासाय् भिल्लारियलया पाकोे अल्कासरया गोलं अग्रता काःगु खः । कासाय् युनाइटेडया निंतिं एलेक्स टेलसं बराबरी गोल याःगु खःसां इन्जुरी टाइमय् क्रिष्टियानो रोनाल्डों गोल याःगु खः । थ्व कासा लिपा रोनाल्डो च्याम्पियन्स लिगय् दकलय् अप्वः कासा म्हितूम्ह कासामि नं जूगु दु । रोनाल्डोया च्याम्पियन्स लिगय् थ्व १७८ औं कासा खः ।

थ्व हे पुचलय् दुगु एटलान्टां योङ ब्वाइजयात १–० गोलं बुकूगु दु । एटलान्टाया निंतिं मोटेओ पेसिना गोल याःगु खः । लिगया समूह ‘इ’ च्वंगु बार्यन म्युनिखं डिनामो किभयात ५–० गोलं बुकूगु दु । बार्यन म्युनिखया निंतिं रोवर्टो लेवान्डोस्कीं निगू गोल याःगु खःसा सर्जी जीनाब्री, लरेय साने व चोपो मोटिङं छगू छगू गोल यात । थ्व हे पुचलय् दुगु स्पेनिस महारथी बार्सिलोना धाःसा पराजित जूगु दु । च्याम्पियन्स लिगय् बार्सिलोनाया थ्व निगूगु पराजय खः । बार्सिलोेनायात पोर्चुगिज क्लब बेन्फिकां ३–० गोलं बुकूगु खः । बेन्फिकाया नितिं डार्विन नुनेजं निगू व राफा सिल्भां छगू गोल याःगु खः ।
समूह ‘एच’या कासाय् युभेन्ट्सं साविक विजेता चेल्सीयात १–० गोलं बुकल । युभेन्ट्सया निंतिं फेडेरिकों गोल याःगु खः ।