ने. सं. ११४४ कौलाथ्व तृतीया -

पारस खड्कां अन्तर्राष्ट्रिय क्रिकेटं संन्यास काल

एजेन्सी- नेपाः राष्ट्रिय क्रिकेट टिमया पूर्व कप्तान पारस खड्कां अन्तर्राष्ट्रिय क्रिकेटं सन्यास काःगु दु । मंगलवाः सुथय् सामाजिक सञ्जालय् छगू विज्ञप्ति पिकासें खड्कां अन्तर्राष्ट्रिय क्रिकेटं सन्यास कायेगु घोषणा याःगु खः । विज्ञप्तिइ पारस खड्कां दक्व नेपाली क्रिकेट समर्थक व सरोकारवालातय्त कृतज्ञता प्वंकुसें अन्तर्राष्ट्रिय क्रिकेटं सन्यास कायेगु क्वःछिना धयातःगु दु । खड्कां नेपाःया निंतिं म्हितागु जीवनया सर्वश्रेष्ठ उपलब्धस् जूगु धाःगु दु ।

विज्ञप्तिइ पूर्व कप्तान खड्कां सन् २००२ लय् थः १५ दँ दुबलय् निसेंयागु क्रिकेट यात्राय् साथ, समर्थन, माया व हौसला बिउपिं दक्व प्रशिक्षक, कासामि, प्रशंसक,सरोकारवाला,मिडियाकर्मी, थःगु परिवार व पासापिं प्रति न्ह्याबलें ऋणी जुयाच्वनी धाःगु दु । खड्कां अन्तराष्ट्रिय क्रिकेट यात्रा क्वचाःगु खःसां क्रिकेटया निंतिं थःम्हं खनागु म्हगस अझं पूमवंनी धाःगु दु । सकलें जानाः नेपाःया क्रिकेटयात च्वन्ह्याकीगु खँय् थःत विश्वास दुगु नं खड्का धाःगु दु ।

पारस खड्कां सन् २००२ निसें नेपाःया क्रिकेट यात्रा न्ह्याकूगु खः । खड्कां सन् २००९ निसें सन् २०१९ तक नेपाःया राष्ट्रिय क्रिकेट टिमया कप्तान जुयाः टिमया नेतृत्व याःगु खः । नेपाःया निंतिं खड्कां झिगू अन्तर्राष्ट्रिय एकदिवसीय कासा व ३३ गू टी–२० कासा म्हितूगु दु । पारसया कप्तानीं नेपाःयात डिभिजन ५ निसें एकदिवसीय कासाय् अन्तराष्ट्रिय मान्यता बिइत सफल जूगु खःसा नेपालं खड्काया कप्तानीं सन् २०१४य् जूगु टि–२० विश्वकप नं म्हितल ।

संन्यास लिपा पारस खड्का क्रिकेटया व्यवस्थापनय् ज्या यायेगु धाःगु दु । निदँ लिपा जुइगु क्रिकेट संघया चुनावय् ब्वति कायेगु खड्कां धाःगु दु । क्रिकेट संघया चुनावय् ब्वति कायेत क्रिकेट त्वःतूगु निदँ दयेमाःगु नियम दु । खड्कां क्रिकेटय् दुगु विकृतिविरुद्ध ल्वायेमाःगु व थ्व ज्या याकःचां जक सम्भव मदुगुलिं सकसिनं साथ बिइ धयागु आशा याना धाःगु दु । क्रिकेट संघं धाःसा पारसया संन्यास अप्रत्यासित धाःगु दु ।